Монголын медиа корпораци “Ардын үг” иргэдийн зөвлөлдөх аяныг үргэлжлүүлэн зохион байгуулж буй. Өмнө нь тус аяныг Дорноговь аймаг, Сүхбаатар, Баянгол дүүрэгт амжилттай зохион байгуулж байсан билээ.

Энэ удаад орон даяар зохион байгуулах бөгөөд Монгол Улсын сонгуулийн насны иргэдийг төлөөлөх 400 хүнийг санамсаргүй түүврийн аргаар сонгож хэлэлцүүлэгт оролцуулан Ерөнхийлөгч Ц.Элбэгдоржийн найман жилийн ажлыг дүгнүүлэх юм.

Тэгвэл иргэд Монгол Улсын Ерөнхийлөгч Ц.Элбэгдоржийн өнгөрсөн найман жилийн хугацаанд хийсэн ажлыг хэрхэн дүгнэж буйг сурвалжиллаа.

-Ц.Элбэгдорж Ерөнхийлөгч маань хангалттай ажиллаж чадаагүй-

-Би Ерөнхийлөгчдөө сэтгэл дундуур явдаг. Яриа нь ихдээд байх шиг санагддаг. Шилэн дансны хууль тодорхой хэмжээгээр хэрэгжсэн. Ц.Элбэгдорж Ерөнхийлөгч маань хангалттай ажиллаж чадаагүй.

-Ерөнхийлөгч сүүлийн үед иргэдээ бухимдуулсан зүйл ярих болсон-

-Ерөнхийлөгч Ц.Элбэгдорж өнгөрсөн хугацаанд үр дүнтэй ажилласан. Гэхдээ сүүлийн үед “Манай улс хөгжихгүй” гэх мэт ард иргэдээ бухимдуулсан зүйл ярих болсон.

-Ерөнхийлөгч маань амласан амлалтандаа хүрсэнгүй-

-Өнгөрсөн найман жилийн хугацаанд Ерөнхийлөгч маань амласан амлалтандаа хүрсэнгүй. Их л гоё ярих юм. Гэхдээ ярьдаг шигээ ажиллаж чадаагүй. Анх Ц.Элбэгдорж Ерөнхийлөгчөөр сонгогдож байхад нь шударга ёсыг л биелүүлээсэй гэж хүсч байлаа.

-Ц.Элбэгдорж Ерөнхийлөгч оюутны 70 мянган төгрөгийг 90 мянга болгоно гэж байсан-

-Ц.Элбэгдорж Ерөнхийлөгч оюутны 70 мянган төгрөгийг 90 мянга болгоно гэж байсан. Тухайн үед Ц.Элбэгдорж Ерөнхийлөгчид оюутнууд хамгийн их санал өгсөн байх аа. Гэхдээ оюутны 70 мянган төгрөгийг бэлэн тарааж байхаар оюутан залуусыг хөгжүүлэх сургалт, семинар зэрэг оюунлаг ажил хийсэн бол илүү үр дүнтэй болох байсан болов уу гэж бодож байна-

-Авлигатай тэмцэнэ л гэж сонгогдсон шүү дээ-

-Авлигатай л тэмцэнэ гэж сонгогдсон Ерөнхийлөгч шүү дээ. Гэтэл авлига багассангүй, бүр улам цэцэглэж байна. Ерөнхийлөгч Ц.Элбэгдор энэ найман жилийн хугацаанд ажлаа муу хийсэн дээ.

Дашрамд дурдахад, Ерөнхийлөгчийн мөрийн хөтөлбөртэй танилцсан мэдээлэлтэй нэгэн байхад мөрийн хөтөлбөрийг хараагүй гэх хүмүүс ч цөөнгүй байв.