Төр нийгмийн зүтгэлтэн С.Зоригийн амь насыг бүрэлгэсэн хэргийн шүүх хурал таван өдрийн турш хаалттай хэлэлцэгдэж, өчигдөр шийдвэрээ гаргасан. Шүүхээс уг хэрэгт холбогдуулан Орхон аймгийн харьяат малчин Б.Содномдаржаа, тогооч Т.Чимгээ, Ц.Амгаланбаатар нарыг хүн амины онц ноцтой гэмт хэрэгтэн мөн гэж үзэн 24-25 жилийн хорих ял оноосон юм.

Т.Чимгээд 24 жилийн ялыг чанга дэглэмтэй эмэгтэйчүүдийн хорих ангид эдлүүлэхээр шийдвэрлэсэн бол шүүгдэгч Б.Содномдаржаа, Ц.Амгаланбаатар нарт 25 жилийн хорих ял оноосон. Ингэхдээ тэд 23 жилийг нь гянданд, үлдсэн хоёр жилийг нь онцгой дэглэмтэй хорих ангид эдлэхээр болсон.

Шүүхийн шийдвэртэй холбогдуулан хохирогчдыг төлөөлж С.Оюун өчигдөр мэдэгдэл гаргасныг бид хүргэсэн билээ. Мэдэгдлийг ЭНДЭЭС уншаарай.

Тэрээр шүүх хурлын дараа анх удаа “Ийгл Ньюс” телевизэд ярилцлага өглөө. Түүний ярилцлагыг хүргэе.

-Өчигдөр та хохирогчдыг төлөөлж мэдэгдэл гаргасан. Тус мэдэгдлийг гаргах болсон шалтгаан юу байв?

-Өчигдөр би хохирогчдыг төлөөлж шүүхийн шийдвэрт эргэлзэж байгаа тухайгаа мэдэгдэл гаргасан. Би яагаад эргэлзэж байгаа вэ гэдгийг хэлэх эрхгүй. Учир нь, уг хэрэг төрийн нууц гэдэг үндэслэлээр. Нөгөө талаасаа бас хууль хяналтынхан шүүгдэгчдийг хэрхэн нотолсноо мэдээлэх боломжгүй. Мөн л төрийн нууц гэдэг утгаар. Ингээд бүгд утгагүй байдалд орчихоод байна.

-Та уг нь шүүх хурлыг нээлттэй хэлэлцэх хүсэлтийг тавьж байсан шүү дээ?

-Би анхнаасаа л хэргийг нээлттэй болгоё гэж Нийслэлийн прокурор, шүүхт хүсэлт гаргасан. Энэ хэрэг чинь хүн амины хэрэг. Хүн амины хэргийг нууцаар шүүнэ гэж юу байдаг юм бэ. Зарим хэсгийг нь хаалттай хэлэлцээд зарим хэсгийг нь хуралдаж болох юм. Бид ийм л шаардлага тавьсан. Харамсалтай нь, Нийслэлийн прокурор энэ бидний хүсэлтийг хүлээж аваагүй.

Мөн бид шүүх дээр хэргийн нууцлалыг нууц байлгана гэдэг дүгнэлт нь өөрөө төрийн нууцын дагуу болсон уу үгүй юу гэдэг дээр шинжээчдийн бүрэлдэхүүн томилох хүсэлт тавьсан. Тэрийг бас хүлээж аваагүй.

-Таныг төлөөлж танай өмгөөлөгч шүүх хуралд оролцсон. Та яагаад шүүх хуралд оролцсонгүй вэ?

-Шүүх хурлыг нээлттэй явуулахгүй гэсэн тул би эсэргүүцээд оролцоогүй. Би нэгэнт хаалттай юман дотор ороод, тэнд дотор өөрийн байр сууриа илэрхийлж чадахгүй гарч ирнэ. Эргэлзээтэй эсвэл итгэлтэй гэдэг дээр өөрийн байр сууриа илэрхийлж чадахгүй. Тиймээс тэр процессын нэг хэсэг болохыг хүссэнгүй.

Бид өнөөдөр УИХ-ын Тусгай хяналтын дэд хороонд хаалттай байдалд байгаа шинжээчийн дүгнэлтийг хянаж өгөөч ээ гэдэг албан тоот хүргүүлсэн. Ард түмэн минь  энэ олон жил хэргийг илэрнэ гэж итгэж ирсэн. Бид ч гэсэн найдаж, итгэж, хүлээцтэй, тэвчээртэй хандсаар ирсэн. Уг нь хэрэг шүүхэд шилжихэд нээлттэй болно гэсэн ойлголттой явсан. Гэтэл болоогүй.

-Энэ хэргийг бүрэн шийдэгдсэн гэж ерөөсөө бодохгүй байна-

-Та хохирогч талын үүднээс хавтас хэрэгтэй танилцсан уу?

-18 жилийн дараа анх удаа хавтаст хэрэгтэй танилцах боломжийг хохирогчдод олгосон. Өмнө нь мөрдөн байцаалтын нууц гээд энэ хавтас хэрэгтэй танилцуулдаггүй байсан. Гэхдээ төрийн нууц учраас гарын үсэг зураад танилцсан байгаа.

-Шүүх хурал дээр юу яригдсан нь бүгдэд нууц байгаа. Гэхдээ ямар нотлох баримтуудад үндэслэн тэр гурван хүнийг яллачихсан юм бол. Таны бодлыг сонсмоор байна?

-Тэрийг чи прокуророос асуух ёстой. Гэхдээ прокурор хариулт өгөх болов уу даа. Өмнө нь хүн амины хэргийг хаалттай хэлэлцэж байсан тохиолдол байдаггүй юм билээ. Зарим хэргүүдийн тодорхой хэсгийг хаалттай, зарим хэсэг нь нээлттэй хэлэлцэж байсан тохиолдол байсан юм билээ.

Захиалагч нь хэн бэ гэдэг нь мэдэгдэхгүй.

Би энэ хэргийг бүрэн шийдэгдсэн гэж ерөөсөө бодохгүй байна. Тухайн үеийн улс төрийн нөхцөл байдлын талаар гэрчүүдийн өгсөн мэдээллүүд байдаг. Тэр хүмүүсийн дийлэнх нь улс төрийн зохион байгуулалттай аллага байсан болов уу гэдэг таамаглалыг хэлсэн байдаг. Гэтэл одоо ахуйн шинжтэй, шуналын сэдлээр үйлдсэн хэрэг ч болчихов уу. Тэгсэн хэрнээ захиалгатай ч юм шиг. Захиалагч нь хэн бэ гэдэг нь мэдэгдэхгүй.

-Ярилцсанд баярлалаа.

-Бид дараагийн давж заалдах шатны шүүх хурлыг зайлшгүй нээлттэй байх ёстой гэдэг шаардлагыг тавьж байгаа. Би энэ хэргийг бүтэн шийдэгдсэн гэж ерөөсөө бодохгүй байна.