"Эрдэнэт"-ээр АТГ-т хандсан, Цэцэд хандах эрх ч нээлттэй үлдсэн

Засгийн газрын Хэрэг эрхлэх газрын дарга Ж.Мөнхбатаас дараахь тодруулгыг авлаа.

-Засгийн газар “Эрдэнэт” үйлд­вэр­тэй холбоотой асуудлыг УИХ-аар хэлэлцүүлэх шийдвэр гаргасан. Мөн УИХ-ын сонгуулийн маргааш танай нам энэ асуудлаар Үндсэн хуулийн цэцэд хандана гэж мэдэгдэж байсан. Энэ асуудлууд юу болж байна вэ?

-Засгийн газар УИХ-д өргөн мэ­дүүлж танилцуулна гэж шийдвэр гар­гасан. Үүнийхээ дагуу Засгийн газрын ажлын хэсгийн дүгнэлтийг УИХ-д өргөн барьсан. Өнгөрсөн долоо хоногт УИХ-ын үйл ажиллагааг үргэлжлүүлж эхлэхдээ энэ асуудлыг Хууль зүйн байнгын хороонд хуваарилсан. УИХ-ын зарим гишүүн нээлт­тэй хэлэлцүүлэхийг шаардаж байна. Цаашид хэрхэн хэлэлцэх вэ, нээлт­тэй хэлэлцэх үү, хаалттай хэлэл­цэх үү, нээлттэй сонсгол зохион бай­гуулах уу гэдэг нь УИХ-ын бүрэн эрхийн асуудал. Засгийн газар бол холбогдох бүх материалаа УИХ-д өргөн барьсан. Засгийн газар энэ асуудал дээр удаан ажиллаж байна гэсэн шүүмжлэл гарч байгаа. Маш олон баримтыг нягталж суух хэрэгтэй болсон. Мөн “Эрдэнэт” үйлдвэр холбогдох баримт бичгүүдээ гаргаж өгөхгүй удсан. Үүнээс болоод ажлын хэс­гийн дүгнэлт тодорхой хэм­жээгээр удааширсан. Засгийн газар ажлын хэсгийн дүгнэлтийг хэлэл­цээд энэ бүх шийдвэрийг гаргасан тодорхой албан тушаалтнууд хууль зөрчсөн эсэхийг шалгуулахаар хууль хяналтын бай­гууллагуудад шил­жүүлсэн. Тухайлбал, АТГ-т хандсан. Тэгэхээр энэ асуудал хууль хяналтын байгууллагуудын шийд­вэрлэх асуудал болж хувирсан. Хууль зөрчсөн эсэхийг нь Засгийн газар тог­тоохгүй шүү дээ. Харин Үндсэн хууль зөрчсөн эсэхийг нь тогтоолгох асуудал нээлттэй. Гэхдээ одоогийн Засгийн газар өмнөх Засгийн газраа Үндсэн хууль зөрчсөн гэдэг үндэслэлээр Цэцэд хандах нь утгагүй. Харин ямар ч хувь хүн энэ асуудлаар Цэцэд хандаж болно. Энэ бол нээлттэй. Бас хууль хяналтын байгууллага шалгаад эхлэхээр Үндсэн хууль зөрчсөн эсэх нь бас хөндөгдөх байх.

-Өмнөх Засгийн газрын “Эрдэнэт” үйлдвэртэй холбоотой асууд­лыг хэлэлцсэн хуралдааны прото­колыг олон нийтэд ил болгоно гэсэн. Гэтэл яагаад одоо болтол ил болгохгүй байгаа юм бэ?

-Зургадугаар сарын 13-ны Засгийн газрын хуралдааныг Ерөнхий сайд Ч.Сайханбилэг удирдсан юм билээ. Танхимынх нь гишүүд энэ шийдвэрийг дэмж­сэн санал хэлсэн. Энэ асуудлыг Засгийн газрын хуралдаанд оруулж нууцын зэрэглэлээр хэлэлцүүлсэн хүн бол тухайн үеийн Аж үйлдвэрийн сайд Д.Эрдэнэбат. Тухайн өдрийн Засгийн газрын хуралдааны протоколыг нууцын зэрэглэлээс гаргахаар Тагнуулын ерөн­­хий газарт албан бичиг илгээсэн. Энэ асуудлаар тодорхой мэдээлэл авахыг албан бичгээр хүссэн УИХ-ын гишүүдэд ажлын хэсгийн дүгнэлт, Зас­гийн газрын хуралдааны протоколыг өгч байгаа.

-Тантай уулзсаных бас нэг зүй­лийг асуулгүй өнгөрч болохгүй нь. Оюутолгой төслийн хөрөнгө оруулагчид гүний уурхайн бүтээн байгуулалтын санхүүжилтдээ зориулж нэг тэрбум ам.доллар нэмж зээлэх санал гаргасан гэсэн мэдээлэл бий. Энэ үнэн үү?

-“Оюутолгой” компани өнгөрсөн онд 4.4 тэрбум ам.долларын зээл авсан. Гэвч “Хөрөнгө оруулалтад нь дахиад санхүүжилт хэрэгтэй байна” гэж ярьж байгаа юм билээ. Гэхдээ үүнийг эцэслэн шийдээгүй. Ч.Сайханбилэгийн тэргүүлсэн Шийдлийн Засгийн газрын үед хийгдсэн “Дубайн гэрээ”-г бид эргэж харах ёстой. УИХ, Засгийн газар, ҮАБЗ-д танилцуулж тодорхой чиглэл, зөвлөмж авалгүйгээр гадаадад очиж хийсэн гэрээ шүү дээ. Энэ гэрээ Монгол Улсын үндэсний аюулгүй байдал, эрх ашигт нийцэж байгаа эсэх, эдийн засгийн хувьд үр ашигтай юу, үгүй юү гэдэг тодорхой бус байна. Бидний авч байгаа мэдээллээр бол Монгол Улсын эдийн засагт нэлээд сөрөг нөлөөтэй байж болохоор гэрээ болсон гэж үзэж байгаа. 4.4 тэрбум ам.долларын зээлийг захиран зарцуулах эрх нь хөрөнгө оруулагч талд бий. Тиймээс энэ мөнгө зөвхөн гүний уурхайн бү­тээн байгуулалтдаа зарцуулагдсан эсэх нь тодорхойгүй байгаа. Энэ асуудлаар Сангийн сайдаар ажиллаж байсан Ч.Улаан гишүүнээр ахлуулсан ажлын хэсгийн хийсэн шалгалтын дүгнэлт бий. Бид энэ бүхнийг нэгтгээд нэг ярих ёстой юм билээ.    

-Ч.Улаан гишүүнээр ахлуулсан ажлын хэсэг гэдэг нь өмнөх парла­ментын үед ажилласан ажлын хэсэг үү. Эсвэл шинээр байгуу­лагдсан аж­лын хэсэг юм уу?

-Шинээр ажлын хэсэг гарч ажил­лаа­гүй. Өмнөх ажлын хэсгийн тухай ярилаа.

-Ер нь Засгийн газар хөрөнгө оруу­­лагчдын дахин нэг тэрбум ам.дол­лар зээлэх саналыг тийм ч амар­­хан хүлээж авахгүй гэсэн үг үү?

-Албан ёсоор нэг тэрбум ам.дол­лар зээлэх тухай санал ирээгүй. Аль ч төвшинд шийдвэр гаргаагүй бай­­на. Зөвхөн хөрөнгө оруулагч тал “Дахин нэг тэрбум ам.доллар зээлэх шаардлагатай байна” гэж ярьж байгаа юм билээ.

Эх сурвалж:


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)

ЭНЭ ТУХАЙ