Хөдөлмөр, халамжийн үйлчилгээний ерөнхий газраас хүүхдийн мөнгийг олгож эхэлсэнтэй холбогдуулан мэдээлэл хийлээ. Хүүхдийн мөнгийг энэ сарын 5-ны өдрөөс олгож эхэлсэн. Ингэхдээ санхүүгийн хүндрэлтэй байгаа одоогийн нөхцөл байдалтай уялдуулан хүүхдийн мөнгийг хоёр өөр хугацаанд олгохоор зохицуулсан билээ.
Өөрөөр хэлбэл, өрхийн мэдээллийн нэгдсэн санд байрлаж байгаа амьжиргааны түвшний 502, 567 гэсэн босго онооноос доогуур өрхийн хүүхдүүд мөнгөө хуучин жишгээр буюу бэлнээр авна. Харин энэ босго онооноос дээгүүр түвшний өрхийн хүүхдүүдэд 2019 оноос олгохоор болоод буй.
Энэ үеэр Нийгмийн халамжийн бодлогын хэрэгжилтийн Бодлогын дарга Б.Мандхайгаас зарим зүйлийг тодрууллаа.
-Хүүхдийн мөнгө нь дансанд нь ороогүй байгаа эцэг эхчүүд “Манай хүүхэд хүүхдийн мөнгөнөөс хасагдчихлаа” гэх ойлголттой байна. Зарим хүүхдэд яагаад 2019 онд хүүхдийн мөнгийг нь олгохоор зохицуулсан юм бэ?
-7, 8, 9 дүгээр сарын хүүхдийн мөнгө хэвийн олгогдож байна. Иргэд “Манай хүүхэд хүүхдийн мөнгөнөөс хасагдчихлаа”, “Хүүхэд маань авахгүй үлдчих вий” гэж санаа зовох шаардлагагүй. “Хүний хөгжил сангаас хүүхдэд мөнгө олгох” журмын дагуу бүх хүүхэд мөнгөө авна.
Харин мөнгөө гар дээрээ авах цаг хугацааны хувьд зохицуулалт хийгдсэн гэж ойлгох хэрэгтэй. Өөрөөр хэлбэл, дансанд тань хадгаламж хэлбэрээр байрших юм. Ингээд 2019 оноос бэлнээр авах боломж бүрдэнэ.
-Иргэд амьжиргааны босго оноогоо мэдэхийн тулд хаана хандах ёстой вэ?
-Иргэд, өрхийн амьжиргааны түвшний босго оноогоо мэдэхийн тулд өөрийн амьдарч байгаа сум, хорооныхоо нийгмийн халамжийн мэргэжилтэнд очиж хүсэлт гаргаж, 502, 567 босго онооны шугамны хаана нь байгаагаа мэдэх боломжтой.
-Одоогоор амьжиргааны 502, 567 гэсэн босго оноонд хичнээн хүүхэд хамрагдаж мөнгөө аваад байна вэ?
-Өрхийн мэдээллийн нэгдсэн санд байрлаж байгаа амьжиргааны түвшний 502, 567 гэсэн босго онооноос доогуур өрхийн 660 мянган хүүхэд мөнгөө аваад байна. Харин үлдсэн 400 мянга орчим хүүхдэд мөнгийг нь 2019 оноос олгоно. Цаашид хүүхдийн мөнгөний олголттой холбоотой ямар нэг чирэгдэл, бэрхшээл үүсэхгүй.