Өнөөдрөөс эхлэн маргааш хүртэл нийт нутгаар хур тунадас, нойтон цас орж хүйтрэхийг ЦУОШГ-аас анхааруулсаар байгаа билээ. Өнөөдрийн байдлаар орон нутгийн замд Увс аймагт нойтон цас орж, замын гадаргууд хальтиргаа гулгаа үүсч болзошгүй нөхцөл үүсээд байна.
Мөн иргэдийн өгч буй мэдээллээр Сэлэнгэ аймгийн Хүдэр, Ерөө сумд руу газрын давхрага бүрхсэн их цас орсон байна. Тиймээс тус чиглэлийг зорих жолооч нар анхаарал болгоомжтой хөдөлгөөнд оролцохыг Авто тээврийн үндэсний төвөөс мэдээллээ.
Мөн нийслэлээс баруун тийш буюу Төв аймгийн Эрдэнэсант сумаас цааш цас бороо холилдон орж үзэгдэх орчин тааруу, цаг агаар муудаж байгаа тул жолоочид орон нутгийн замын нөхцөл, үзэгдэх орчныг зөв тооцоолж анхаарал болгоомжтой зорчихыг анхаарууллаа.
Энэ үеэр салхины хурд 16 м/с хүрч ширүүсэх төлөвтэй байгаа аж. Тиймээс малчид, тариаланчид хээр газарт ганцаар гарах, хүүхэд болон настануудыг малд явуулахгүй байж аюулгүй байдлаа хангахыг сэрэмжлүүлж байна.
Эдгээр өдрүүдэд халтиргаа гулгаа үүсэх, ил задгай хүнсний ногоо хайрагдаж, хөлдөж болзошгүй байгаа тул ил задгай худалдаа эрхлэгчид болон тариаланчид цаг агаарын байдалд тохируулан ажлаа төлөвлөхийг ч санууллаа.
