Амжилтанд хүрэхийг хүссэн хүн бүрт байх ёстой 7 жагсаалт

Сербийн хэл шинжээч, нийтлэлч "Djordje Todorovic" хувь хүний хөгжил болон бүтээлч амьдрахуйн талаар олон гайхалтай нийтлэл бичжээ. Тэдгээрээс амжилттай амьдрахыг хүссэн хүн бүрт зориулсан "танд" байх ёстой жагсаалтуудаас хүргэе.

Зорилгын жагсаалт

~ Зорилгодоо хүрснээр чиний юу олж авч байгаа нь чухал биш, харин хэн болж байгаа чинь л чухал. – Henry David Thoreau

Зорилго хүсэл тэмүүлэл гэдэг та биднийг амжилтанд хөтлөх гол хөшүүрэг юм. Гэвч та энэ амьдралдаа чухам юу хийж бүтээхийг бас юунд хүрэхээр хичээн зүтгэх вэ гэдгээ өөрөөсөө нэхэн нэг асуугаарай. Энэ жагсаалтгүйгээр амьдрал тань утгагүй ч болж мэднэ. Тэгэхээр өглөө болгон өөртөө тавьсан зорилгоо сануулж бичсэн жагсаалтаа харж байгаарай.

Төлөвлөгөө

~ Амжилт өмнөө тулгарсан саад бэрхшээлийг давахын төлөөх хичээл зүтгэлийн үр шимээр ирдэг. – Theodore Isaac Rubin

Өдөр тутмаас эхлэн долоо хоног эсвэл сар, жилийн төлөвлөгөө нь амьдралын зорилгодоо хүрэх чиглүүлэгч болдог. Тиймээс хийх зүйлсийнхээ жагсаалтыг заавал гаргаж, ард нь гарсныхаа дараа бага гэлтгүй өөрийгөө урамшуулж байгаарай. Ялангуяа гэртээ ажиллах үедээ наалддаг цаасан дээр бичиж, нүднийхээ өмнө ил тавих нь бүтээлч байдлыг нэмэгдүүлдэг.

Хэрэг болох зүйлсээ тэмдэглэсэн жагсаалт

~ Мөрөөдөлдөө хүрэхийн тулд "яаж" гэдэг арга замаа судалсан байх хэрэгтэй. – Vin Diesel

Технологийн асар хурдацтай хөгжлийн ачаар ажлыг тань хөнгөвчлөх маш олон ухаалаг хэрэгсэл гарчээ. Тэдгээрээс хэрэгтэй гэснээ сонгон авч, зарим нэгнээс нь суралцахын зэрэгцээ цагаа хэмнэх боломжтой. Жагсаалтандаа бизнес уулзалт хийхэд хамгийн тохиромжтой ресторанаас эхлээд ажлаа явуулахад хэрэг болох зүйлсээ тэмдэглээрэй.

Хувь хүний хөгжлийн төлөвлөгөө

~ Суралцаагүй өнгөрүүлсэн минут бүртээ өөрийгөө үхсэнд тооц. – Jack Nicholson

Алхам тутамдаа өөрийгөө хөгжүүлж, байнга шинийг эрэлхийлж байгаарай. Энэ төлөвлөгөөндөө өөрийнхөө өөрчлөхийг хүссэн бас өөрийгөө хөгжүүлэхэд хэрэгтэй зүйлсээ тэмдэглээрэй. Тухайлбал, фитнесээр хичээллэх, уншихаар сонгосон хувь хүний хөгжлийн тухай номын жагсаалтаа гаргасан ч болно.

Бүтээлч санаагаа тэмдэглэсэн жагсаалт

~ Бусдын биш, өөрийн гаргасан замаар мөрөө үлдээж амьдар. – Ralph Waldo Emerson

Бүтээлч байдлаа нэмэгдүүлэх хамгийн оновчтой арга зам нь бодолд харван орж ирсэн шинэ санаануудаа тэмдэглэх явдал юм. Гэвч зөвхөн тэмдэглээд л өнгөрөх биш, тухай бүрт нь хөгжүүлэх боломж юу байна, ажилтайгаа хэрхэн уялдуулах вэ зэргээр бүтээлч хандлагыг төлөвшүүлэн, хөдөлмөрлөх нь таныг заавал амжилтанд хүргэнэ.

Эрсдлийн жагсаалт

~ Бороо ороосой гэж хүсч л байгаа бол шавар шалбааг болно гэдгийг битгий март. – Denzel Washington

Аливаа зүйл эерэг, сөрөг гэсэн хоёр талтай. Амжилт бүр алдаа эрсдлийг дагуулж байдаг. Гэхдээ энэ нь эрсдэл заавал гарах ёстой гэсэн үг биш. Хэрэв гарвал бэлтгэлтэйгээр давж гарахын төлөө энэ жагсаалтыг гаргах учиртай юм. Эрсдлийн жагсаалтаасаа алдаа оноогоо дүгнэн, ирээдүйдээ илүү туршлагатай болох болно.

Энэ насандаа хийж үзэх зүйлсийн жагсаалт

~ Оршуулган дээр урсдаг хамгийн гашуун нулимс бол хэлж чадаагүй бас хийж амжаагүй зүйлсийн төлөөх харууслын нулимс байдаг. – Harriet Beecher Stowe

Эцэст нь нэгэн насны амьдралдаа харамсахгүйн төлөө хийж үзэхийг хүссэн бас хэн нэгэнд хэлэхийг хүссэн зүйлсийнхээ жагсаалтыг гаргаарай. Энэ жагсаалт таныг эерэг хандлагаар эрч хүчтэй амьдрахад тань тусална.

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.