Уул уурхай, хүнд үйлдвэрийн сайд Ж.Ганбаатар Засгийн газрын хуралдаанаар гаргасан шийдвэрийг танилцууллаа.
Тэрээр "Ховд аймгийн Мянгад сумын нутаг дахь Халзан бүрэгтэйн ордод хамаарах хоёр тусгай зөвшөөрөлтэй холбоотой асуудлыг хууль тогтоомжийн дагуу судалж, орон нутгийн иргэдийн саналыг харгалзан шийдвэрлэхийг БОАЖ-ын сайд Б.Бат-Эрдэнэ бид хоёрт даалгалаа. Энэ ордыг “Mongolian national rare earth” компани 100 хувь эзэмшдэг. Хоёр тусгай зөвшөөрөлтэй. Энэ компанийн хувьцааг Худалдаа хөгжлийн банк 100 хувь эзэмшдэг. Анх 2001, 2004 тусгай зөвшөөрөл олгосон. Монгол Улсын ашигт малтмалын нөөцийн ангилалд газрын ховор элемент гэж бүртгэгдсэн. 268 сая тонн хүдрийн нөөцтэй. Эцсийн бүтээгдэхүүний нөөц нь 1.2 сая тонн. Монгол Улс гурван сая тонн газрын ховор элементийн нөөцтэй. Түүний 30 гаруй хувь нь энэ ордод бий. Уул уурхай, хүнд үйлдвэрийн яам энэ оны дөрөвдүгээр сарын 29-нд дотоод хяналт шалтгалт хийгээд уурхайн үйл ажиллагааг нь түр зогсоох шийдвэр гаргасан. Хайгуул хийх явцдаа “Mongolian rare earth” компани хэд хэдэн хууль зөрчсөн, байгаль орчны менежментийн төлөвлөгөөг БОАЖЯ-аар батлуулаагүй, сумын удирдлагаар батлуулсан зэрэг зөрчил илэрсэн. Мөн ус ашиглах зохих зөвшөөрлөө аваагүй. Иймд бид арга хэмжээ авч байна.
Ер нь хувийн хэвшил өөрийн хөрөнгөөр хайгуул хийсэн бол тухайн ордын 34 хүртэл хувийг эзэмших эрхтэй байдаг. Төр энэ ордыг авахгүй. Хуулийн дагуу ажилладаг хувийн хэвшлийг төр дэмжинэ. Хэрэв сумын иргэд ордыг эдийн засгийн эргэлтэд оруулна гэвэл хайгуулыг үргэлжлүүлнэ. Энэ ордоос одоогоор олборлолт огт явуулаагүй байгаа. Зарим иргэн буруу ойлгосон тул зориуд онцолж хэлэх нь зөв. Хайгуулыг нь түр зогсоож байгаа нь ордын тусгай зөвшөөрлийг цуцалсан гэсэн үг биш.
Засгийн газраас энэ ордтой холбоотой тогтоол гаргасан. Бид АНУ-тай газрын ховор элементийн чиглэлд хамтран ажиллахаар гэрээ байгуулсан. БНСУ-тай хамтран Судалгааны хүрээлэн байгуулахаар ажиллаж байна. Газрын ховор элементийн технологи төрийн нууцад хамаардаг" гэв.
