Сурагчдын бүтээлээс бүтсэн “MERAKI” уран зургийн үзэсгэлэн "Монгол арт галерей"-д дэлгэгдлээ. Тус үзэсгэлэн 2019 оноос эхлэн жил бүр уламжлал болон зохион байгуулагдаж буй. Тэгвэл энэ жилийн үзэсгэлэнд 1-9 дүгээр ангийн сурагчдын сэтгэл, зүрхээ шингээн бүтээсэн 600 орчим уран бүтээл дэлгэгдсэн байна. Үзэсгэлэнгээс олсон бүх орлогыг Улаанчулуутын "Нарны хүүхдүүд" цэцэрлэгт хандивлах аж. Энэхүү үзэсгэлэн тавдугаар сарын 28-ныг хүртэл үргэлжилнэ. 

Артын багш Б.Цэрэндэжид: -“MERAKI” үзэсгэлэн дөрөв дэх жилдээ зохион байгуулагдаж байна. Жил ирэх тусам хүрээгээ тэлж, илүү олон сурагчдыг хамруулах болсон. Энэ жилийн тухайд   Монгол арт галерейн гурван давхрыг тэр чигт нь сурагчдынхаа бүтээлийг дэлгэхэд ашиглаж байна. Хүүхэд хүүхдийнхээ төлөө хийж буй сайн дурын үйл ажиллагаа гэдгээрээ онцлог. Урлаг, уран зураг сонирхож, өөрийн бүтээлээ гаргана гэдэг сурагчдын хувийн хөгжилд онцгой нөлөөтэй. Түүнчлэн “MERAKI” үзэсгэлэнгийн жил бүрийн орлого хэн нэгний сайн сайхны төлөө хандивлагддаг. Энэ жилийн тухайд бид олсон орлогоо  Улаанчулуутын "Нарны хүүхдүүд" цэцэрлэгт хандивлана. 

 

Аравдугаар ангийн сурагч У.Анударь: -Уг зургийн үзэсгэлэн нь жил бүр зохион байгуулагддаг бөгөөд хүүхдүүдийн дотоод сэтгэлийн мөн чанарыг уран зургаар илэрхийлж гаргадгаараа онцлог. Түүнчлэн сурагчдын бүтээлээс олсон орлого жил бүр хэн нэгэнд тус дэм болж, хүрдэг нь өөрөө их гоё зүйл. Энэ жилийн тухайд “MERAKI” үзэсгэлэнд маш олон сурагч оролцож байна. Хэн нэгэнд туслах нь өөрөө сайхан зүйл учраас ийм олон хүүхэд нэг зорилгын төлөө нэгдэж байгаа нь талархууштай.

 

Арваннэгдүгээр ангийн сурагч Б.Анар: -Өнгөрсөн арваннэгдүгээр сард би энэ зургийг зурж байсан. Зурган дээрээ тархины эсийг харуулахыг зорьсон юм. Энэ нь миний хими, биологийн хичээлдээ сонирхолтой маань ч холбоотой байх. Ерөнхийдөө өөрийн бодол дундаа гацаж, төөрөгдөлд орсон охины тухай зураг. Миний тухайд “MERAKI” уран зургийн үзэсгэлэнд хоёр дахь жилдээ оролцож байна. Энэ жил өөрийн бүтээлээ үзэсгэлэнд дэлгэснээс гадна сайн дурын багт мөн ажиллаж байгаа. 

 

Эцэг эхийн төлөөлөл Ц.Алтансор: -“MERAKI” уран зургийн үзэсгэлэнд оролцож байгаадаа баяртай байна. Охин маань жил бүр “MERAKI”-д идэвхтэй оролцдог. Энэхүү үйл ажиллагаагаар дамжуулж хүүхэд нийгэмшихүйн процесст суралцаж, бусдад чин сэтгэлээсээ туслах, байгаа бүхнээ хэн нэгэнд зориулах чадварт суралцдаг гэж боддог. Үзэсгэлэнгээр дамжуулж сурагчид өөрийн дотоод мөн чанарыг илэрхийлж, гаргаад зогсохгүй өгөөмөр нинжин сэтгэлтэй байхын мөн чанарыг ухамсардапаг. Ер нь хүүхдэд бага наснаас нь зүрх сэтгэлийн боловсрол олгох нь их чухал. Анзаарахнээ, энэ нийгэмд маш олон чадварлаг боловсон хүчин байгаа хэдий ч хүн хүнээ гэх сэтгэл дутагдаж байна. Тэр ч утгаараа охиноо иймэрхүү үйл ажиллагаанд оролцохыг дэмжиж, аль болох туслахыг хичээдэг.

Фото сурвалжилга

---