ЦХХХ-ны сайд Н.Учрал “Шилэн” ажиллагааны хүрээнд Засгийн газрын хоёр тусгай сангийн талаар мэдээллээ.

Тэрээр "Засгийн газраас хэрэгжүүлж буй 5Ш ажиллагааны хүрээнд гуравдугаар сарын 29-ны өдөр шилэн ажиллагааг эхлүүлсэн. Найм дахь долоо хоног дээрээ та бүхэнд мэдээлж байна.

Монгол Улсад нийт 25 тусгай сан байна. Өнгөрсөн хугацаанд ЖДҮ сангийн мэдээллийг байршуулсан. Дөрвөн долоо хоногийн дараа 3 тэрбум төгрөгийн эргэн төлөлт хийгдсэн байна. Түүнчлэн Нийгмийн халамжийн сан, Соёл урлагийн сан, Автозамын сан зэргийн мэдээллийг ил болгосон. Энэ мэтээр нийтдээ есөн тусгай сангийн мэдээллийг shilen.gov.mn системд нээлттэй, ил тод болгоод байна. Мэдээлэл дутуу ирүүлсэн байгууллага байна. Зохих шаардлагыг бид хүргүүлж байна. Мэдээлэл огт ирүүлээгүй байгууллага ч бий. Үлдсэн 16 сангаас хоёр тусгай сан буюу “Спортыг дэмжих сан”, “Өргөн нэвтрүүлэг хөгжүүлэх сан”-гууд үйл ажиллагаа явуулаагүй байна.

Ерөнхий сайдын албан даалгаварт маш тодорхой үүрэг багтсан. БЗС-гийн мэдээлэл "Шилэн" ажиллагаа эхлэхээс өмнө ил болсон. Бодит утгаар нь, нэр ус, овог нэртэй, он дараалалтай нь харах бололцоо төдийлөн алга. Тийм учраас ийм бололцоог өнөөдөр хангаж байна. Суралцсан чиглэл, санхүүжилтийн төлөв гэх мэт ангиллаар нь тодорхой ангилж, байршуулсан. Ингэснээр иргэд хэн, хэзээ, ямар сайдын үед зээл аваад төлөөгүй эсвэл төлбөр бэ гэдгийг дэлгэрэнгүй харах боломжтой боллоо. Ийм хэлбэртэйгээр БЗС-гийн мэдээллийг ил болгож байна.

Цаашид тусгай сангуудын менежментийг хэрхэн сайжруулах вэ гэдгийг эргэж харах шаардлагатай байна. Төрийн үйл ажиллагаа иргэдийнхээ хяналтад бүрэн очиж байна. Тэгэхээр нийгмийн хандлага их өөрчлөгдөж байна. Тиймээс авлигатай тэмцэх хөтөлбөрийг олон нийтийн дэмжлэгээр давж гарах хэрэгтэй байна.

Энэ долоо хоногтоо багтаан Байгаль орчин уур амьсгалын сан, Шинжлэх ухаан технологийн сан, Бүх нийтийн үүргийн үйлчилгээний санг шилэн болгоно. Энэ удаад Хөдөлмөр эрхлэлтийг дэмжих сан болон Нийгмийн даатгалын сангийн мэдээллийг ил болгож байна. Хөдөлмөр эрхлэлтийг дэмжих сан гэхэд сүүлийн 10 жил 1.8 сая иргэнд 628.4 тэрбум төгрөг олгожээ. Үүнээс 122.6 тэрбум төгрөгийг дэмжлэг хэлбэрээр зарцуулсны 58.2 тэрбум төгрөг эргэн төлөгдөөгүй. Төлөгдөөгүй дүн нь байгаад байхад дараа жилийн төсөв дээр дахиад төсөв нэмэгдүүлээд зээл олгогдоод байдаг. Зээлийн үлдэгдэл 58.2 тэрбумын 18 тэрбум нь чанаргүй зээл болсон. Зээл төлөгдөөгүй дүн нь байсаар байхад дараа жил төсвийг нь нэмээд, дахиад дэмжлэг олгоод байдаг. Мэдээллийг иргэн тус бүрээр харах боломжтой" гэлээ.