УИХ-ын чуулганы нэгдсэн хуралдаанаар мал сүргийн хаваржилт, хаврын тариалалтын бэлтгэл хангах, нөөцийн мах худалдаалах арга хэмжээний талаар ХХААХҮ-ийн сайд Х.Болорчулуун мэдээлэл танилцууллаа.

Тэрбээр "11 аймгийн малчдад малын тэжээл, түлш шатахуун гээд нийт 450 сая төгрөгийн дэмжлэг үзүүллээ. Ирэх онд улсын хэмжээнд 586 мянган га талбайд тариалалт хийнэ. Хөдөө аж ахуйг дэмжих сангаас энэ хаврын тариалалтад зориулж, 10 мянган тонн улаанбуудайн үр олгохоор болсон. Улсын 620 сая төгрөгийн санхүүжилтээр хүлэмжийн аж ахуйд тариалах нарийн ногооны үр худалдан авах ажлыг зохион байгуулж байна. Газар тариалангийн үйлдвэрлэл эрхлэгч нарт хөрөнгө оруулалт эргэлтийн хөрөнгийн зээлийг арилжааны банкаар дамжуулан олгохоор ажиллаж байна. Энэхүү арга хэмжээний хүрээнд таван хувийн хүүтэй 110 тэрбум төгрөгийн эргэлтийн хөрөнгийн зээл олгоно" гэлээ.