Сүүлийн жилүүдэд бүсгүйчүүдийн дунд хиймэл сормуус хийлгэх хэрэгцээ улам бүр нэмэгдээд буй. Үүнийгээ дагаад энэ төрлийн бизнес ч манайд эрчимтэй хөгжиж байна. Ихэнх салон сормуус хийх үйлчилгээ үзүүлэхээс гадна төлбөртэй сургалт хүртэл явуулж, төгсөгчиддөө сертификат олгодог болсон. Нэг үгээр хэлбэл “сормуустай” холбоотой юм бүхэн эрэлттэй болжээ. Хаа сайгүй дэрвэгэр өтгөн сормуустай охид, бүсгүйчүүд дэргэдүүр чинь зөрдөг л биз дээ. Та ч тэдний нэг байж мэдэх юм.
Гоё сайхан, харагдах талаасаа сормуус хийлгэх нь өөртөө итгэх итгэлийг нэмэгдүүлдэг хэдий ч зохист хэмжээ, эрүүл аюулгүй байдал талаасаа огтхон ч тийм биш. Ялангуяа мэргэжлийн бус артистаар хийлгэвэл сормуусны сувгийг гэмтээж, сормуусны ургалтыг зогсоох эрсдэлтэй. Түүнчлэн хиймэл сормуусыг тогтоодог цавуу нь химийн өндөр найрлагатай учраас нүдийг улайлгах, загтнуулах, нүдний ойр орчмын арьсыг улайлгах эрсдэлтэй байдаг. Мөн хиймэл сормуус хийлгэсний дараа хэд хоногтоо ус хүргэж болдоггүй учраас нян, бактери үржих магадлалтай.
Хиймэл сормуусыг таны сормуусны ширхэг бүр дээр шигтгэх замаар тогтоодог тул төрөлх сормуусыг шингэрүүлдэг байна. Зарим тохиолдолд сормуус суулгасны дараа нүд аргах, загатнах, халуу шатах, ханиах, найтаах, амьсгалахад хүнд болох, толгой өвдөх зэрэг шинж тэмдэг илэрвэл харшилсны шинж. Ийм шинж тэмдэг илэрсэн үед яаралтай мэргэжлийн эмчид хандах хэрэгтэй.
Нөгөө талаас өмнө нь урт, өтгөн сормуустай байж байгаад сормуусаа авхуулсны дараа өөрийн нүдэндээ дасахгүй уддаг. Тиймээс дахиад сормуус хийлгэхийг хүсдэг байна. Энэ нь өөрөө өөрийгөө голох, хиймэл сормуусанд донтох нэг хэлбэр юм. Тиймээс охид, бүсгүйчүүд албан ёсны гоо сайхны газарт, эрүүл ахуйн шаардлага хангасан нөхцөлд мэргэжлийн артистаар сормуусаа хийлгэж байхыг холбогдох мэргэжилтэн нь зөвлөлөө.
