Бидний нэрлэж заншсанаар Мартын 8 буюу Олон улсын эмэгтэйчүүдийн эрхийг хамгаалах өдөр тун удахгүй тохиох гэж байна. Энэ өдөр хайртай дотнын эмэгтэйчүүддээ барих бэлгийн салшгүй нэг хэсэг бол гоёмсог цэцгийн баглаа билээ. Ийнхүү бид цэцгийн баглааны үнэ ханш ямар байгааг сурвалжлахаар Улсын их дэлгүүр болон “Цэцэг” төвийг зорив.

Энэ жил цэцгийн үнэ өмнөх жилийнхээс харьцангуй өсжээ. Тухайлбал, Их дэлгүүрийн нэг давхарт байрлах цэцгийн дэлгүүрт нэг ширхэг сарнай 7000-8000 төгрөг байсан бол “Цэцэг төвд” 9000-12000 төгрөгийн үнэтэй байлаа. Өнгөрсөн жил нэг ширхэг сарнай 5000-6000 мянган төгрөгөөр зарагдаж байв. Харин энэ жилийн хувьд цэцгийн баглааны дундаж үнэ 60-280 мянган төгрөгийн хооронд байна. Түүнчлэн иргэд цэцгийн баглаагаас гадна чихмэл тоглоом, улаан дарс, амттан, бэлэг дурсгалын багцыг сонгож авах болжээ. Үнийн хувьд сонголтоосоо  шалтгаалаад 45-180 мянган төгрөгийн хооронд худалдаалагддаг аж.

Удвал цэцэг хүндэтгэлийг илэрхийлдэг

Цэцэг болгон өөрийн гэсэн бэлгэдэлтэй. Улаан сарнай нь хайр дурлалыг илэрхийлдэг бол лили аз жаргалыг бэлгэддэг. Тэгвэл Мартын 8-наар хүндэтгэлийн цэцэг буюу удвал цэцгийг сонгох нь элбэг байдаг аж.  Удвал цэцгийн хувьд ширхэг, баярын боолтоосоо шалтгаалаад үнийн хувьд янз бүр. Тухайлбал, нэг ширхэг удвал цэцэг 7500 төгрөг бол баярын боолттой 5-7 ширхэг удвал цэцгийг 65 мянган төгрөгөөр худалдан авах боломжтой аж. Ийнхүү бид иргэд ямар төрлийн цэцэг ихэвчлэн худалдан авч байгаа талаар болон цэцгийн борлуулалтын талаар “Их дэлгүүр”-ийн худалдааны зөвлөх Ш.Наранзулаас тодрууллаа.

Тэрээр” Иргэдийн хувьд ихэвчлэн лили, улаан сарнай, цагаан, шар өнгийн удвал цэцгийг худалдан авдаг. Баярын өдрүүдээр лили эрэлт ихтэй байдаг.  Мөн улаан, ягаан сарнайн багцыг иргэд их сонирхож авдаг. Энэ жилийн хувьд цэцгийн бизнес сайн байгаа. Бид баярын өдрүүдээр зөвхөн цэцгээс гадна баярын багц буюу бэлэг дурсгалын зүйлсийг санал болгодог. Түүнчлэн мартын 8-наар албан байгууллагууд хамт олноо баярлуулахаар цэцгийн захиалга их өгдөг болсон. Захиалгын хувьд хүний тооноос шалтгаалаад цэцгийн үнийг дунджаар 1000-1500 төгрөгөөр хямдруулдаг” гэлээ.

Ингээд та бүхэнд цэцгийн баглааны үнэ ханшийн талаар дэлгэрэнгүй хүргэж байна.

Тухайлбал:

• Гурван ширхэг сарнайтай цэцгийн баглаа 35 мянган төгрөг
• Таван ширхэг сарнайтай цэцгийн баглаа 55 мянган төгрөг
• Нэг ширхэг лили цэцэг 25 мянган төгрөг
• Лили, удвал цэцгийн багц 89 мянган төгрөг
• Гурван ширхэг лили баярын баглаатай 85 мянган төгрөг
• Алтанзул, лиш цэцгийн баглаа 55 мянган төгрөгийн хооронд худалдаалагдаж байна.

99 ширхэг сарнайн багц 999 мянган төгрөгөөр худалдаалагдаж байна

Иргэдийн хувьд мөн хайртай, дотнын хүндээ гэнэтийн бэлэг барихаар цэцэг хүргэлтийн үйлчилгээг сонгодог. Тэгвэл хүмүүсийн хамгийн сайн мэдэх “Цэцэгт мэндчилгээ”, "Баглаа" зэрэг онлайн дэлгүүр баярын багцаа гаргажээ. Үнийн хувьд хамгийн хямд нь 199 мянган төгрөгөөс эхэлж байгаа бол хамгийн үнэтэй цэцгийн багц буюу 99 ширхэг сарнайн багц 999 мянган төгрөгөөр худалдаалагдаж байна. Үүн дээр нэмэлтээр дарс, чихмэл тоглоом, нэрийн бүтээгдэхүүнийг худалдан авах боломжтой аж.

Цэцгийн баглааны дундаж үнэ

---