Амьтантай ойр өссөн хүүхэд аливаа зүйлийг хайрлах, энэрэх чадварт суралцдаг
Бага наснаасаа эхлэн амьтантай ойр өссөн хүүхдийн сэтгэл зүй илүү зөөлөн, аливаа зүйлийг хайрлах, энэрэх чадварт бусдаас илүү суралцсан байдаг. Харин эцэг эхчүүд амьтан тэжээхийн хүндрэлтэй талыг нь голчлон харж, хүүхдийнхээ хүсэл сонирхлыг үгүйсгэх нь бий. Тэжээвэр амьтантай байх нь таны хүүхдийн зан төлөв болон эрүүл мэндэд эерэг нөлөөтэй.
Тухайлбал:
- Амьтантай ойр өссөн хүүхэд харшил болон багтраа өвчнөөр өвчлөх нь бага байдаг
- Гэрийн тэжээвэр амьтантай гэр бүл илүү их салхилж, дасгал хөдөлгөөн их хийдэг
- Амьтныг хайрлаж, энэрэх нь аливаа зүйлийн үр дагаврыг эргэцүүлэх чадварт сургадаг
Түүнчлэн эрүүл аюулгүй байдал талаасаа тэжээх амьтнаа шинжилгээнд хамруулж, тогтмол вакцин хийлгэх, малын эмчид үзүүлэх хэрэгтэй.
Тэжээвэр амьтнаа сонгосны дараагаар анхаарах зүйлс
Гэр бүлийн шинэ гишүүнд хүүхэд чинь хэрхэн яаж хандаж байна вэ, эсрэгээрээ гэрийн тэжээвэр амьтан хүүхдэд ямар нөлөө үзүүлж байна вэ гэдгийг ажиглах хэрэгтэй. Бага насны хүүхэд эрсдэлийг тооцолгүйгээр амьтныг уурлуулж, хазуулах, маажуулах тохиолдол цөөнгүй гардаг. Иймд эцэг эхчүүд амьтантайгаа дасан зохицох хүртэл нь тавих хараа хяналтаа сайжруулах хэрэгтэй. Түүнчлэн амьтныг хайрлаж, зовоолгүйгээр тоглох хэрэгтэйг ойлгуулах, хэрэв тэдэнд хүндэтгэлгүй муухай хандвал эргээд чамайг хазах, гэмтээх эрсдэлтэйг ойлгуулах нь зүйтэй. Аливаа зүйлийг хайрлаж, хамгаалсны хариуд тэднээс хайр хүртэх боломжтойг ойлгуулах нь чухал юм.