Манай улсын сайдууд өрнөж буй үйл явдал бүрээс хоцрохгүйг хичээж, цаг минут тутамтай уралдан фэйсбүүк пост, жиргээнүүд оруулдаг. Гэтэл үүнээсээ болж эхнээсээ онигоонд ороод эхэллээ. Энэ долоо хоногт л гэхэд хоёр ч Засгийн газрын гишүүн жиргээ, постноосоо болж хөгөө чирэв.
Байгаль орчны сайд яамны ажлаа “андуурав”
Эхнийх нь Байгаль орчин аялал жуулчлалын сайд Б.Бат-Эрдэнэ. Хэнтий аймгийн Мөрөн залуусын санаачлан зэрлэг амьтан байршин нутагладаг бүсэд өвс, лаг, хужир, долооц зэрэг байршуулсныг өөрийн яамны ажил мэт сурталчлан таниулсан нь иргэдийн дургүйг хүргэлээ.
Анх энэхүү постыг оруулахдаа БОАЖЯ-ны яамны хийсэн ажил мэтээр оруулсан.

Гэвч удалгүй засаж, өнөөдөр постоо устгаснаар энэхүү “онигоо” өндөрлөлөө.



Нэг танхимд ажиллаж буй сайдууд дундаа поп стилээрээ алдартай тэрээр цаг агаарын мэдээг ч мэдээлдэг билээ.
ХЗДХ-ийн сайдын “худал” жиргээ
Нөгөөх нь ХЗДХ-ийн сайд Х.Нямбаатар. Тэрээр 2022 оны есдүгээр сарын 20-нд Цахим орчинд хүний эрхийг хамгаалах тухай хуулийн төсөлд “Meta” компаниас хамтрах тухай твиттер хуудсаараа жиргэжээ. Тодруулбал, "Мета компанийн Төв Ази, Монгол, Хятадыг хариуцсан захирал ноён Жорж Чентэй уулзаж ХЗДХЯ-наас боловсруулсан Цахим орчинд хүний эрхийг хамгаалах тухай хуулийн төсөл дээр хамтарч ажиллах, Мета платформын мэдээллийн аюулгүй байдлыг хамгаалах багтай хамтарсан ажлын хэсэг байгуулахаар боллоо" хэмээсэн юм.

Харин түүний энэхүү мэдээлэл ташаа болохыг Жорж Чен өөрийн твиттер хаягаараа дамжуулан өнөөдөр /2023.01.27/ мэдэгдлээ.

Тэрээр "Тийм биш. Бид хуулийг яаравчлан батлахаас өмнө төсөлтэй нь танилцаагүй. Харин аль хэдийнэ батлагдсан хойно анх удаа харсан" хэмээжээ.
Мөн Олон нийтийн сүлжээнд хүний эрхийг хамгаалах тухай хуулийн талаар иргэд, төрийн бус байгууллага өөр өөрсдийн санал бодлоо илэрхийлж байх үед “Мета” компанийн төв Ази, Хятад, Монгол Улсын олон нийтийн бодлого хариуцсан захирал Жорж Чен өөрийн твиттер хаягтаа "Үзэл бодлоо чөлөөтэй илэрхийлэх нь хүний үндсэн эрх-Монголчуудын хувьд ч мөн адил" гэж жиргэж байжээ.

Энэ жиргээнээс үзвэл ХЗДХ-ийн сайд Х.Нямбаатар худлаа залсан болж таарах нь.