Нийслэлийн ИТХ-д нэр дэвшигчдийг Нийслэлийн сонгуулийн хороо албан ёсоор зарлаад байгаа. Тэгвэл тус хорооноос Тусгаар тогтнол эв нэгдлийн нам, Монголын ногоон нам, Эх орончдын эвсэл болон бие даагчдын төлөөлөл мэдээлэл хийж, 19 бие даагчийг бүртгэхээс татгалзсан талаар мэдээлэл хийлээ.
Тэд Нийслэлийн сонгуулийн хорооны шийдвэрийг эрх зүйн чадамжгүй хууль бус шийдвэр бөгөөд нэр дэвшигчийг бүртгэхээс татгалзсан нь Үндсэн хуулийг зөрчсөн үйлдэл гэдгийг хурлын эхэнд онцолсон юм.
Энэ талаар Ногоон намын гишүүн О.Бундхорол "Сонгуулийн тухай хуульд эвсэл болон бие даагчдыг нийслэлийн ИТХ-д нэр дэвшүүлэхгүй гэсэн ганц ч үг өгүүлбэр байхгүй. Зөвхөн намын тухай бичсэн байсан. Хуульд тусгайлан хориглосон гэсэн заалт ороогүй л бол зөвшөөрсөнд тооцдог. Тиймээс нийслэлийн ИТХ-д бие даагч болоод, эвслээс нэр дэвших боломж бий. Харин энэ хуулийн зүйл заалтыг тайлбарлах нь сонгуулийн хорооны хийх ажил биш .МАНАН шударга сонгуулиас айж байгаа учир ийм башир арга хэрэглэж байна. Ардын хүүхэд барилдаж болдоггүй наадам юм уу. Энд олигархи, оффшор данстай, хууль цалгардуулж, хувьдаа хөрөнгө завшиж байсан нэг ч хүн байхгүй. Бид шударгаад өрсөлдөж, нэр дэвшиж болдоггүй сонгууль юм уу. Ард түмэн сонголтоо хийх ёстой биз дээ. Эрх баригчид сонгогчдын Үндсэн хуулиар олгосон эрхэнд бүдүүлгээр халдаж байна ” гэлээ.
Өнөөдөр эрх баригчид бие даагч нараас айж байна. Нам эвслүүдээс эмээж байна. Хар машинаас илүү аюул энэ байна.
Мөн энэ үеэр Монголын Ногоон намын дарга О.Бум-Ялагч "Бие дааж нэр дэвшинэ гэдэг бол үнэхээр том зориг. Ард нь аппарат байхгүй, дэмжлэг байхгүй гав ганцаараа галын шугаманд явна. Өнөөдөр эрх баригчид бие даагч нараас айж байна. Нам эвслүүдээс эмээж байна. Хар машинаас илүү аюул энэ байна. Сонгууль гэж олигтой юм болохгүй нь харагдаж байна. 19 хүнээс магадлалаараа ядаж хоёр хүн тэнцэж болно ш дээ. Улайм цайм луйвар сонгуулийн өмнө эхэлж байна. Шударга сонгууль болно гэдэгт эргэлзэж байна. АН, МАН-ынхан өөрсдийгөө л зөвхөн сонгох боломж бүрдүүлж Сонгуулийн хуулиа баталсан” гэлээ.
Дээрх иргэд орон нутгийн сонгуульд намаас нэр дэвших боломжийг бүрдүүлж, бусад бие даагч, эвслийг хязгаарласан нь шударга бус шийдвэр гэж үзэн шүүхэд хандаад байгаа юм байна.
Нийслэлийн ИТХ-ын сонгуульд оролцохоор хоёр эвсэл буюу Эх орончдын нэгдсэн эвсэл- тав, Тусгаар тогтнол эв нэгдлийн эвсэл-32 нийт 37 нэр дэвшигчийн материал бүрдүүлэн өгчээ. Гэвч Сонгуулийн тухай хуульд зааснаар орон нутгийн сонгуульд тухайн орон нутагт салбартай зөвхөн нам оролцоно гэж тодорхой зохицуулсан байх тул эвслийн нэр дэвшигч нарыг бүртгэх нь хууль зүйн үндэслэлгүй гэж үзсэн байна. Өөрөөр хэлбэл, бие даан нэрээ дэвшүүлэхээр 19 хүний дүүргийн сонгуулийн хороодоор гарын үсгийг нягтлахад гэр бүлийнхнийгээ төлөөлж гарын үсэг зурсан, хаяг дээрээ байдаггүй оршин суугч, сонгуулийн насанд хүрээгүй хүнээр гарын үсэг зуруулсан байсан хэмээн Нийслэлийн Сонгуулийн хорооноос мэдэгдсэн.