Чингис хааны музейд Их Монгол улсыг үндэслэн байгуулагч, Дэлхийн мянганы суут хүмүүн “Чингис хааны мэндэлсний 860 жилийн ой” сэдэвт шуудангийн марк, дугтуй, ил захидлын тусгай үзэсгэлэнгийн нээлтийн ёслол боллоо.
Маркийн тайлбар: Монгол шуудангийн түүхэнд анх 1962 онд Эзэн Богд Чингис хаан мэндэлсний 800 жилийн ойд зориулан 4 нэрийн марк гүйлгээнд гарсан байдаг. Үүнээс хойш нэгэн жарны хугацаанд Чингис хааны мэндэлсний 830, 840, 850, 860 жил, Чингис хаанд өргөмжилсний 800, 810 жил /бичвэр, засвартай, 23к алт/, Монголын нууц товчооны 750, 770 /цуврал-2/, 780 жил, Мизухара 1991 он, Тайбей 1993 он маркийн үзэсгэлэн, Их Монгол Улс байгуулагдсаны 790, 800 /22к алт, цуврал-2, торго/, 805, 810 жил, Чингис хааны баатрууд, Монголын эзэнт гүрэн, Хүн төрөлхтний түүх, Монгол - Америк хооронд дипломат харилцаа тогтоосны-20, Монгол маркийн-85 /бичвэртэй/, Монгол банкны-90, АСЕМ-ын 20 жилийн ой зэрэг сэдвээр 40 гаруй удаа Чингис хааны хөрөг, хөшөөг дүрслэн гаргажээ.
Түүхэн тэмдэглэлт тэгш ойн жилд зориулсан “Чингис хааны мэндэлсний 860 жил” сэдэвт 6 нэр, 1 блок маркт Чингис хааны алтан зоос, алтан гэрэгэ, номын гэрэлт хөшөө, Есөн хөлт Их цагаан туг, Чингис хааны хөрөгтэй анхны марк, Чингис хаан музей, Чингис хааны шинэ хөргийг тус тус сонгон оруулсан байна. Маркийг бүтээхэд Чингис хаан музейн захирал, академич С.Чулуун, академич Д.Төмөртогоо, СГЗ Ж.Саруулбуян, ШУА-ийн Түүх, угсаатны зүйн хүрээлэнгийн доктор (PhD), профессор А.Пунсаг, түүхч доктор (PhD) Б.Нямаа, Төрийн шагналт, уран барималч Ц.Амгалан, Төрийн соёрхолт, УГЗ, уран барималч Л.Болд, Чингис хааны өв, соёлын хүрээлэнгийн захирал, доктор (PhD) Н.Саруул, ахмад дипломатч О.Батсайхан нар мэргэжлийн зөвлөгөө өгч, зураг материалын туслалцаа үзүүлж хамтран ажиллажээ.
