Я.Содбаатар: Хоёр эрхэмд "Чингис хаан" одонг гардуулна

Ерөнхийлөгчийн Тамгын газраас "Чингис хаан" одон хүртээх талаар өнөөдөр мэдээлэл хийлээ. "Чингис хаан" одонг маргааш монголч эрдэмтэн Жэк Уэтерфорд, ШУА-ийн газар зүй, геоэкологийн хүрээлэнгийн тэргүүлэх ажилтан, академич Д.Доржготов нарт хүртээнэ. Энэ удаа "Чингис хаан" одонг анх удаа хоёр эрхэмд, мөн гадаад улсын иргэнд олгох гэж байгаагаараа онцлогтой байна. 

Ерөнхийлөгчийн Тамгын газрын дарга Я.Содбаатар "Монгол бахархлын өдрийг тохиолдуулан Ерөнхийлөгч зарлиг гаргаж, хоёр эрхэмд төрийн дээд одон Чингис хаан одонг гардуулах болсныг дуулгаж байна. Энэхүү хоёр эрдэмтэн түүх соёл, байгаль судлалын салбарт ажилласан. Энэ жил Монголчууд бидний хувьд онцгой түүхэн жил болж байна. АНУ-ын эрдэмтэн Жэк Уэтерфордийг шагнахаар болсон. Тэрээр Монголын түүх соёл, Чингис хаан, эзэнт гүрний талаар олон бүтээл туурвисан. Түүний 2004 онд гаргасан “Өнөөгийн эзэнт гүрэн ба Чингис хаан” бүтээл нь “Нью Йорк” таймс сонины шилдэг бүтээлээр шалгарч, 300 гаруй мянган хувь хэвлэгдэж, 20 гаруй улс оронд хэвлэгдсэн. Энэхүү бүтээлээр Монгол ба Чингис хааны талаарх дэлхийн түүхэнд үлдсэн олон ойлголтыг залруулж, Чингис хаан бол чөлөөт худалдаа, нээлттэй харилцаа, мэдлэг мэдээллийн солилцоо, хууль эрх зүй, дипломат халдашгүй байдал, шашны эрх чөлөө сүм хийдээс ангид байх тогтолцоог тавьснаар өнөөгийн ертөнцийг үндэслэсэн их хаан юм гэдэг үзэл санааг дэвшүүлсэн. 

Мөн Газар зүй, геоэкологийн хүрээлэнгийн эрдэм шинжилгээний тэргүүлэх ажилтан, доктор, профессор Д.Доржготов гуайд Чингис хаан одонг олгохоор боллоо. Тэрээр Монголын хөрс судлал, байгаль орчны чиглэлээр олон бүтээл туурвисан, нэрт эрдэмтэн, академи, ахмад эрдэмтдийн нэг.

Д.Доржготов өнгөрсөн хугацаанд эрдэм шинжилгээний 30 гаруй сэдэв, төслийн хүрээнд Монгол Улсын хөрс байгаль орчин, экологийн чиглэлээр судалгааны ажил хариуцан гүйцэтгэж дотоодын болон эх орны ихэнх нутгийг хамарсан хээрийн экспедиц зохион байгуулж 310 гаруй бүтээлийг дангаар болон хамтран туурвиж, 80 гаруй бүтээл нь орос хэл дээр, 30 орчим бүтээл нь англи, герман хэл дээр орчуулагдаж хэвлэгдсэн нэрт эрдэмтэн. Мөн түүнчлэн хөрсний гарал үүсэл газар зүй, ангилал, үржил шим, чанарын ангилал зэрэгт ихээхэн анхаарч олно арван бүтээл гаргасан. 1970 оноос эхлүүлэн Монгол орны газар зүйн байрлалыг тогтоох, хөрсний ангилал зүй, “Монгол орны хөрс” хэмээх томоохон судалгааны бүтээлийг хэвлүүлж байсан. Тэрээр Монголын шинжлэх ухааны салбарт төдийгүй газар зураг зүйн салбарт олон гавьяа байгуулсан эрдэмтэн юм. Маргааш Чингис хааны бахархлын өдөр холбогдох хууль журмын дагуу одонг олгоно.

Монгол Улсын төрийн дээд шагнал, тэргүүн зэргийн "Чингис хаан" одонг олгох, нэр дэвшүүлэх журам байдаг. Ерөнхийлөгчийн 2013 оны 171 дүгээр зарлигаар батлагдсан. Журамд Чингис хаан одонг Монгол Улсын хамтлаг, хувь иргэн, хуулийн этгээдэд, мөн журмын 2.1.12-т улс түмний эв нэгдэл, хөгжил цэцэглэлт, хүн төрөлхтний амар амгалан бэхжүүлэх болон Монгол Улс гадаад орнуудтай тогтоосон харилцаа, хамтын ажиллагааг хөгжүүлэх, дэлхий дахинд Монгол Улсын нэр хүндийг өргөн сурталчлахад, тус улсын эдийн засаг нийгэм, оюун санааны хөгжилд бодитой хувь нэмэр оруулсан гадаад орны төр нийгмийн зүтгэлтэн, иргэд, эрдэмтдэд энэ шагналыг олгож болно гэж заасан. Энэ шагналд дэвшүүлдэг журам бий бөгөөд холбогдох байгууллагуудаас санал ирүүлж, дэвшүүлдэг. Үүнийг Ерөнхийлөгчийн Тамгын газраас авч үзээд, Ерөнхийлөгчид танилцуулж, шагнал олгодог журамтай" гэв.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (1)

  1. шагнал ч зах замбараагүй болж дээ хүүхэдийн хүүхэд Алангадас зүүгээд аав ээж эмээ өвөө нь байхгүй гэтэл авсан хүүхэд нь чөлөөөт уран бүтээлч эсвэл хувиараа ажилдаг гэх шиг (аав,ээж нь 25-30 жил эмээ,өвөө нь 35-44 жил ажилаад аваагүй ) үр удам руу нь өгдөг болсон юм уу

    0 0 Хариу бичих