Индонезийн газар хөдлөлтөөр амиа алдсан хүний тоо 268-д хүрчээ
Индонезид болсон хүчтэй газар хөдлөлтөөр нурангид даруулсан хүмүүсийг аврах ажил хоёр дахь шөнөө үргэлжиллээ. Ява аралд болсон 5,6 магнитудын хүчтэй газар хөдлөлтөд амиа алдсан хүмүүсийн тоо 268 болж нэмэгдсэн бөгөөд тэдгээрийн дийлэнх нь хүүхдүүд аж. Түүнчлэн 151 хүн сураггүй болж, 1000 гаруй хүн бэртжээ.
Гамшиг өдрийн 13 цагийн үед хичээлийн цагаар тохиосон учир сурагчид сургуулийн барилгад олноороо даруулж амиа алдсан байна.
Ойролцоогоор сургуулийн 80 гаруй барилга сүйдсэн гэдгийг Хүүхдийг ивээх сангаас мэдээллээ. Хүүхдүүд маш их айдаст автаж, гамшигт нэрвэгдсэн хүмүүст ус, хоол хүнс, толгой хоргодох газар хэрэгтэй байгааг тус сангийн төлөөлөгч мэдэгдлээ.
Газар хөдлөлт уулархаг бүсэд болсон учир олон газарт хөрсний нуралт үүсжээ.
Байгалийн гамшигт зам харилцаа ихээр сүйдсэн учир алслагдсан зарим хэсэгт хүрч, тусламж үзүүлэхэд хүндрэлтэй байгаа аж. Индонезийн Үндэсний гамшгаас хамгаалах агентлагийн мэдээлж буйгаар 22 мянган байшин нурж, орон гэргүй болсон 58,000 гаруй хүнийг түр хоргодох байранд шилжүүлжээ.