АНУ-ын прокурорын газар цар тахалтай тэмцэх Засгийн газрын хоолны хөтөлбөрөөс 250 сая ам.долларыг луйвардаж, хувьдаа завшсан хэрэгт 48 хүнийг буруутгалаа.

“Feeding Our Future” ашгийн бус байгууллагыг үүсгэн байгуулагч 41 настай Эйми Бок гэгч эмэгтэй луйврын гол зохион байгуулагчаар сэжиглэгдэж байна. Гэвч тэрээр гэм буруутай үйл ажиллагаа явуулсан гэдгээ хүлээн зөвшөөрөхгүй байгаа юм.

Гэмт этгээдүүд ковид-19 цар тахлын үед хоол, хүнс нэн хэрэгцээтэй байгаа хүүхдүүдийг хооллоход зориулагдах ёстой байсан улсын мөнгөнөөс 250 сая ам.долларыг шамшигдуулж АНУ-аас гадна Кени, Турк улсуудын далайн эрэгт хувьдаа үл хөдлөх хөрөнгө худалдан авч тансаглажээ. Түүнчлэн тансаг зэрэглэлийн автомашин, эд хэрэглэл худалдан авч, гадаадаар аялсан нь ч тогтоогдсон байна.

Энэ нь цар тахлын үед АНУ-д төрөөс санхүүжүүлсэн тусламжийн хөтөлбөрөөс их хэмжээний мөнгө завшсан хамгийн том луйврын хэрэгт тооцогдож байна.

“Feeding Our Future” байгууллага хүүхдүүдэд огт өгөөгүй хоолны тооцооны хуурамч баримтыг их хэмжээгээр бүрдүүлж тайландаа хавсаргажээ. Ингэхдээ зарим хүүхдүүдийн нэрийг www.listofrandomnames.com сайтаас авсан нь тогтоогдсон байна.

Цар тахалтай хэцүү цаг үед хүүхдийн тусламжаас хумсалж жигшмээр үйлдэл гаргасан нь байж боломгүй явдал гэж прокурор Эндрю Люгер хэвлэлийн хурлын үеэр хэллээ. Хэрэгт холбогдогчдыг цахим залилан, мөнгө угаах, хээл хахууль авсан хэргүүдэд буруутган баривчилгаа явуулж эхэлжээ. Гэвч зарим этгээдүүд аль хэдийнэ хил давж зугтсан байна.