Таван ханатай гэр шатаж, 77 настай хөгжлийн бэрхшээлтэй иргэн амиа алджээ 

Баянзүрх дүүргийн 34 дүгээр хороонд таван ханатай гэр шатаж, 77 настай хөгжлийн бэрхшээлтэй эрэгтэй галд өртөн нас баржээ.

Энэ тухай дуудлага мэдээлэл есдүгээр сарын 20-ны өдөр буюу өчигдөр ОБЕГ-т ирсэн бөгөөд тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид очиход иргэн Г-гийн 5 ханатай гэр шатаж байсныг 10 минут ажиллан унтраасан байна. Мөн нас барсан иргэний цогцсыг дүүргийн Цагдаагийн 3 дугаар хэлтсийн мөрдөгчид шилжүүлэн өгчээ.

Иймд иргэд, аж, ахуйн нэгж, байгууллагуудад гал түймрийн аюулаас урьдчилан сэргийлэх дараах зөвлөмжийг ОБЕГ хүргэж байна. 

  • Гэмтэлтэй болон зориулалтын бус цахилгаан утас ашиглахгүй байх,
  • Ил утастай тень, плитка хэрэглэхгүй байх, цахилгаан бага зарцуулдаг стандартын шаардлага хангасан цахилгаан халаагуур хэрэглэх,
  • Цахилгаан залгуур/уртасгагч/-т нэг дор олон буюу цахилгаан хэрэгсэл залгаж ачааллыг хэтрүүлэхгүй байх,
  • Цахилгаан хэрэгслийг залгаатай удаан хугацаагаар орхиж явахгүй байх,
  • Харилцан адилгүй голчтой /зэс, хөнгөн цагаан/ цахилгаан дамжуулах утсыг холбож хэрэглэхгүй байх,
  • Яндангийн цонолт, халалтаас урьдчилан сэргийлэх,
  • Үнс нурмаа ил задгай асгахгүй байх,
  • Гэмтэлтэй пийшин зуух ашиглахгүй байх,
  • Пийшин, зуухны галлагааг хэтрүүлэхгүй байхыг Онцгой байдлын ерөнхий газраас анхааруулж байна.

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)