ЭМЯ: Сармагчны цэцэг өвчнийг илрүүлэх 500 ширхэг оношлуур авсан

Эрүүл мэндийн яамнаас сармагчны цэцэг өвчнөөс урьдчилан сэргийлэхэд эрүүл мэндийн салбарын бэлтгэл хэр хангагдсан талаар мэдээлэл өглөө.

ЭМЯ-ны Нийгмийн эрүүл мэндийн газрын дарга Д.Баярболд "ДЭМБ-ын мэдээллээр БНХАУ-ын Баруун өмнөд бүсэд орших хотын эрүүл мэндийн комиссоос 2022 оны есдүгээр сарын 17-нд сармагчны цэцэг өвчний импортын тохиолдол гарсныг мэдэгдсэн. БНХАУ-д сармагчны цэцэг өвчин бүртгэгдсэн. ДЭМБ-аас таван зөвлөмж өгдөг. Тухайлбал, халдварт өвчнөөс урьдчилан сэргийлэхэд улс орнуудыг тандалт лабораторийн чадавхаа бэхжүүлэх, үндсэн тогтолцоогоо ашиглан тандах зэрэг зөвлөмжийг өгдөг. Манай улсын хувьд Эрүүл мэндийн сайд сармагчны цэцэг өвчний тархалтыг тандах болон өвчлөл илэрсэн тохиолдолд түүнийг эмчлэх удирдамж, зааврыг баталж бэлэн байдлаа хангасан.

Мөн энэ хүрээнд ДЭМБ-ын шугамаар сармагчны цэцэг өвчнийг илрүүлэх 500 ширхэг оношлуур авч, нөөцийг бэлдсэн. Түүнчлэн уг өвчнөөс сэргийлэхэд хилийн нэвтрэх цэгт онцгой анхаарч тандалтыг эрчимжүүлэх шаардлагатай. Үүний дагуу Гаалийн байгууллага гадаадаас ирж буй иргэдээс асуумж судалгааг авч тандаж байна. Сэжигтэй тохиолдлыг ялган оношлох, тусгаарлах, сорьц авах бэлэн байдлыг хангахад зориулж оношлууруудыг бэлдсэн бөгөөд ХӨСҮТ дээр энэ өвчнийг илрүүлэх шинжилгээг хийх бүрэн чадамжийг бэхжүүлсэн.

Мөн анхан шатны тусламж үйлчилгээ үзүүлдэг кабинетын эрүүл мэндийн ажилтнуудад сургалт явуулан эмнэлгийн тусламж үйлчилгээг ханган ажиллаж байна" гэлээ.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)