Тарваган тахал өвчний нөхцөл байдлын талаар ЭМЯ, ЗӨСҮТ-ээс мэдээлэл өглөө.
ЭМЯ-ны Нийтийн эрүүл мэндийн газрын дарга Д.Баярболд “ЗӨСҮТ-өөс гаргасан тарваган тахлын байгалийн голомтын аюулын зэрэглэлээр 15 аймгийн 78 суманд хүний өвчлөл гарах эрсдэл өндөр байна гэж дүгнэсэн. Тарваган тахлын байгалийн голомтын идэвхтэй тандалтыг ЗӨСҮТ байнга хийдэг. 2012-2021 онд нийт зургаан аймгийн 11 суманд 15 хүн тарваган тахлаар өвчилж долоон хүн нас барж байсан судалгаа бий. Ер нь дотоодын аялал жуулчлалын төв зам тарваган тахлын нутагшмал голомттой бүс нутгаар дайран өнгөрдөг нь тухайн нутгийн оршин суугчдаас гадаад, дотоодын жуулчид халдварт өртөх эрсдэл өндөр байна гэж үздэг. Мөн иргэд тарвагыг хууль бусаар худалдаалан, хот суурин газар руу тээвэрлэх, хүнсэнд хэрэглэх явдал тасралтгүй гарсаар байгаа нь эрсдэл дагуулдаг. 2022 он гарсаар Баян-Өлгий зарим сумд, Увс аймгийн Агил, Ховд аймгийн Үенч сумдаас агнасан мэрэгч амьтдаас тарваган тахлыг үүсгэгч нян илрүүлсэн. Тарваган тахлын хүний өвчлөл гарч нийгэм, эрүүл мэндийн ноцтой нөхцөл байдал үүсэх эрсдэлтэй байна. Одоогоор тарваган тахлын хяналт сэргийлэлтийн арга хэмжээг эрчимжүүлэх талаар Эрүүл мэндийн сайд аймаг нийслэлийн засаг дарга, аймгийн эрүүл мэндийн газар, зоонозын өвчин судлалын төвүүдэд хандсан албан даалгавар гаргаж, хүргүүлсэн".
ЗӨСҮТ-ийн ерөнхий захирал Н.Цогбадрах "17 аймгийн 137 суманд тарваган тахлын голомттой бүс нутаг гэж үздэг. Зам харилцаа хөгжсэн энэ үед халдвар зөөвөрлөгдөх өндөр эрсдэлтэй байна. ЗӨСҮТ-д 147 удаагийн дуудлагаар хянан шалгах постууд дээр хот руу орж ирэх гэж байгаад баригдсан 827 тарвага хураагдаж, шинжилгээ хийсэн. Энэ нь хот суурин газар руу тарваган тахлын халдвар зөөвөрлөгдөн орж ирэх эрсдэлтэй байгаа гэдгийг харуулж байна. Хүмүүс ихэвчлэн хавхаар агнаж байна. Хавхаар агнасан тохиолдолд халдвар авах эрсдэл өндөр байдаг. Он гарсаар тарваган тахлын зургаан сэжигтэй тохиолдол гарсан. Есдүгээр сарын 11-нд Ховд аймгийн Цэцэг суманд, 17-нд Жаргалант суманд тарваган тахлын өвчлөл бүртгэгдлээ. Эхний өвчтөнөө суманд нь тусгарлаад эмчилсэн. Одоо хөл хориог цуцалж байгаа. Өвчтөний биеийн байдал харьцангуй сайн байна. Хоёр дахь тохиолдлын тухайд хавхаар агнаад махыг идсэн хүн нас барсан. Түүний хавьтал 40 гаруй хүн байна. Жаргалан суманд өвчилсөн хүний нэгдүгээр хавьтал Улаанбаатар хотод ирсэн байна. Үүнийг бид маршрутын дагуу шуурхай тогтоогоод тухайн орсон газрууд, хавьтал болсон хүмүүс, байгаа айлд нь халдваргүйтгэл хийж, урьдчилан сэргийлэх эмчилгээ хийж эхлээд байна. Тарваган тахал зөвхөн байгалийн тахлын голомттой газар гараад зогсохгүй зөөвөрлөгдөх эрсдэлтэй байна. Үүнээс сэргийлэхийн тулд ард иргэд онцгой анхаарах хэрэгтэй. Тарвага идээд цадаад байх хоол биш. Үүний төлөө явж өөрсдийгөө болон бусдыг битгий эрсдүүлээч. Тарваган тахал эрт үедээ оношлогдвол нас баралт 30-50 хувьтай байдаг маш аюултай өвчин. Уг өвчний нян энхгийн хөргөгчинд байхдаа үхдэггүй. Тийм учраас энэ өвчин улирлын чанартай байхаа больсон байна" гэв.
