АНУ-ын Конгрессын Төлөөлөгчдийн танхимын дарга Нэнси Пелоси өнөөдөр Тайваньд айлчилж магадгүй гэсэн мэдээлэл гарсанаар Азийн хөрөнгийн зах зээл савлаж эхэллээ. Хэдийгээр албан ёсны хөтөлбөртөө зарлаагүй ч хатагтай Пелоси мягмар гарагийн үдэш Тайвань аралд бууна гэсэн таамаглал хүчтэй байна. АНУ, БНХАУ-ын хооронд хурцатмал байдал үүсгээд буй дээрх айлчлалаас улбаатайгаар Азийн хөрөнгийн зах зээлд уналт ажиглагдаж эхэлсэн тухай Аль Жазира суваг мэдээллээ. Тухайлбал эх газрын Хятадын CSI300 индекс 1.4 хувиар буурсан бол Шанхайн нэгдсэн индекс 1.7 хувиар унажээ. Түүнчлэн Хонконгийн Hang Seng индекс 2.5 хувиар буурсан үзүүлэлттэй байна.
Цаашлаад Тайваний TAIEX нэг өдрийн дотор 2.1 хувиар унасан бол Япон, Өмнөд Солонгос, Австралийн үндсэн индексүүд өглөөний арилжаагаар 0.5-1.6 хувиар буурсан дүн үзүүлжээ.
