ОХУ-ын Гадаад хэргийн сайд Сергей Викторович Лавров манай улсад ажлын айлчлал хийж байна.  Айлчлалын хүрээнд Гадаад харилцааны сайд Б.Батцэцэг ОХУ-ын Гадаад хэргийн сайд С.В.Лавровтой хэлэлцээ хийлээ. Хэлэлцээний үр дүнгийн талаар тэд хамтдаа мэдээлэл хийлээ.

Б.Батцэцэг: -Монгол Улс, ОХУ дипломат харилцаа тогтоосны 100 жилийн ойг хоёр тал цар тахлыг үл харгалзан 2021 онд Улаанбаатар, Москва хотоо ёслол төгөлдөр тэмдэглэсэн. Энэ жилээс бидний харилцааны шинэ зуун эхэлж байна. Манай хоёр улс цар тахлын хүндрэлийг хамтран даван туулж, харилцаагаа идэвхжүүлж байгаад баяртай байна. Монгол, ОХУ-ын хамтын ажиллагааг Иж бүрэн стратегийн түншлэлийн үзэл санааны дагуу урагшлуулах талаар санал солилцлоо. Бид харилцаа цар тахлын өмнөх байдалд эргэн орж төмөр зам, агаарын харилцааг сэргээснээр иргэд харилцан зорчих урсгал болон худалдааны хэмжээ мэдэгдэхүйц нэмэгдэж байна.

С.В.Лавров сайдтай хийсэн хэлэлцээний үеэр Ерөнхийлөгч У.Хүрэлсүхийн өнгөрсөн жил ОХУ-д хийсэн айлчлалын үеэр тохиоролцсон ажлуудын хэрэгжилтийг ярилцаж, харилцааны өнөөгийн байдлыг дүгнэж, цаашдын хамтын ажиллагаа, өндөр  дээд түвшний харилцан айлчлалууд, томоохон арга хэмжээ, төслүүдийн талаар санал солилцлоо. Мөн олон жил яригдаж шийдлээ хүлээж буй зарим асуудлын талаар ярилцаж цаашид хэрэгжүүлэх арга хэмжээний төлвийг тодорхойллоо. Монгол, ОХУ-ын харилцан итгэлцсэн хамтын ажиллагааг улам бэхжүүлэхээ хоёр тал нотолсон. Энэ хүрээнд худалдаа, эдийн засгийн хамтын ажиллагааг идэвхжүүлэх, хамтарсан төслүүдийн явцыг урагшлуулах, хоёр талын байгуулсан баримт бичгүүдийн хэрэгжилтэд анхаарах тал дээр санал нийллээ. Манай хоёр улсын худалдааны хэмжээг нэмэгдүүлэх бүрэн боломжтой гэж үзлээ. Сүүлийн үед хоёр улсын бүс нутаг хоорондын хамтын ажиллагаа эрчимжиж хамтын ажиллагааны өргөн боломжууд нэгдэж, хоёр улсын бизнес эрхлэгчид идэвхтэй хамтран ажиллаж байгааг хэлэхэд таатай байна. Ялангуяа Алтанбулаг, Цагааннуур чөлөөт бүсүүдэд ОХУ-ын талаас хөрөнгө оруулах, хамтарсан үйлдвэрүүд, тээвэр ложистикийн төвүүдийг байгуулах сонирхолтой байгаа. Мөн Монгол, ОХУ-ын хилийн боомтуудыг шинэчлэн өргөтгөх, ачаа тээвэрлэлт, иргэдийн урсгалыг нэмэгдүүлэх чиглэлд анхаарал хандуулахаар тохиролцлоо. Хоёр улсын хэрэгжүүлж байгаа хамтарсан төслүүдийн талаар санал солилцлоо. ОХУ, Монгол, БНХАУ эдийн засгийн коридор байгуулах хөтөлбөрийн хүрээнд хэрэгжүүлж байгаа байгалийн хийн хоолойг Монгол Улсын нутаг дэвсгэрээр дамжуулан барих төслийн ажлуудын хуваарийн дагуу хэвийн явагдаж байна. Мөн төмөр замаар манай улсын зүүн болон баруун хэсгээр хоёр хөрштэйгөө холбогдох асуудлыг хөндөж ярилцлаа. УБТЗ нийгэмлэгийн үйл ажиллагааг эрчимжүүлэх, техникийн шинэчлэлийг хэрэгжүүлэх зорилгоор тус нийгэмлэгийн дүрмийн санг нэмэгдүүлэх ажил ахицтай байгаа. Мөн эрчим хүчний эх үүсвэрүүдийн өргөтгөл, шинэчлэлийн хамтарсан төслүүдийг үргэлжлүүлэн хэрэгжүүлэхээр боллоо. Хөдөө аж ахуйн салбарт Монгол Улсын газар тариалангийн техникийн шинэчлэлийн хөтөлбөр болон монгол малыг эрүүлжүүлэх хөтөлбөрийн гуравдугаар үе шатыг хамтран хэрэгжүүлэхээр ярилцлаа. Хүмүүнлэгийн салбарын хамтын ажиллагааны хүрээнд Монгол, ОХУ-ын хамтарсан ЕБС байгуулах ажлыг эрчимжүүлэх, хөрсний доройтол, цөлжилтийн эсрэг хамтран тэмцэх, "Тэрбум мод" үндэсний хөтөлбөрийн хүрээнд хамтарч ажиллах, сансар судлалын салбарын хамтын ажиллагааг сэргээх талаар тохирлоо.

Өнөөдрийн хэлэлцээний үр дүнд сэтгэл хангалуун байна. С.В.Лавров сайдын манай улсад хийж буй айлчлалын үеэр Монгол, ОХУ-ын харилцаа, хамтын ажиллагааны зарим асуудлуудыг шийдвэрлэж, бидний анхаарлыг шаардаж байсан асуудлуудаар үр дүнтэй ярилцаж зарим оновчтой шийдлийг гаргаж чадсан гэж дүгнэж байна. Бидний цаашдын хамтын ажиллагаа үр өгөөжтэй үргэлжилнэ гэдэгт эргэлзэхгүй байна.

С.В.Лавров: -Б.Батцэцэг сайдтай хийсэн хэлэлцээ үр дүнтэй, найрсаг болж өнгөрлөө. Манай хоёр улсын хооронд сайн хөршийн харилцаа, хамтын ажиллагааны олон жилийн турш олон чиглэлээр идэвхтэй хөгжиж байна. ОХУ, Монголын ард түмэн дэлхийн хоёрдугаар дайны он жилүүдийн нөхөрлөлийг нандигнан явж байгаа. Өнөөдрийн уулзалтаар Монгол Улсын тус ялалтад оруулсан хувь нэмрийг дахин өндрөөр үнэллээ. Хоёр талын болон олон улсын хамтын ажиллагааны олон асуудлаар санал солилцлоо. Мөн 2019 онд Улаанбаатар хотноо гарын үсэг зурсан Иж бүрэн стратегийн түншлэлийн дагуу хамтын ажиллагаагаа илүү өргөжүүлэх хүсэлтэй гэдэгт хоёр тал санал нэгдсэн. Өнгөрсөн оны арванхоёрдугаар сард Монгол Улсын Ерөнхийлөгч У.Хүрэлсүхийг ОХУ-д айлчлал хийх үеэр ярилцан тохирсон хамтын ажиллагааны бүхий л асуудлаар санал солилцлоо. Хоёр улсын худалдааны хэмжээ нэмэгдэж байна. 2021 онд 30 гаруй хувиар нэмэгдсэн бол энэ оны эхний хагаст 45 хувиар нэмэгдээд байна. Олон улсын асуудлаарх бидний байр суурь ойрхон байгаа. Манай улс НҮБ-ын Үндсэн дүрэмд заасан бүх дүрмийг баримталж, тусгаар улсуудын эрхийг дээдэлж хамтран ажиллах болно.

Хэлэлцээний үеэр өөрийнхөө зүгээс дэлхий дахины хурцадмал байдлын нарийн шалтгааныг тайлбарлаж АНУ болон түүний холбоотнуудын зүгээс өөрийнхөө асуудлыг бусдын гараар шийдвэрлүүлэх хүсэлтэй байгааг ярилцлаа. Сүүлийн жилүүдэд Украин улсыг ОХУ-ын эсрэг чиглүүлж, аюул занал учруулж байна. Бид энэ асуудлаар үнэн бодит мэдээлэл өгөхийг хүсэж байгаа. Гэвч барууны улс орнууд бодит эх сурвалжийг хязгаарлаж байна. Хоёр талын хамтын ажиллагааны нөөц бололцоогоо бүрэн ашиглаж хамтын ажиллагаагаа улам нягт уялдуулах тал дээр санал нэгдсэн өнөөдрийн хэлэлцээний үр дүнд сэтгэл хангалуун байна.