М.Ананд: Тэмцээнд муу оролцсон гээд шатраа битгий орхиорой гэж хэлмээр байна
-
- О.Эрдэнэчимэг
- 2022-06-20 13:47:30
- 6
Ирэх есдүгээр сарын 15-28-ны хооронд Гүрж улсын Батуми хотноо болох Өсвөрийн шатарчдын Дэлхийн аварга шалгаруулах тэмцээн болон 2022 оны аравдугаар сарын 13-22-ны хооронд Индонезийн Балид болох Азийн аварга шалгаруулах тэмцээний 9-10 насны ангилалд Монгол Улсаа төлөөлөн оролцох “Улаанбаатар Элит” олон улсын дунд сургуулийн 4а ангийн сурагч М.Анандтай ярилцлаа. М.Ананд 10 хүртэлх насны шатрын тамирчид дундаа түргэн тоглолтын олон улсын чансаагаар нэгдүгээрт бичигддэг бөгөөд 2020, 2022 оны Өсвөрийн шатарчдын улсын аварга шалгаруулах классик буюу стандарт төрлийн хоёр удаагийн хошой аварга, мөн Өсвөрийн шатарчдын түргэн буюу блиц төрлийн улсын аварга болсон юм.
Шатар хэдэн настайдаа тоглож сурсан бэ?
Би дөрвөн настайдаа анх шатар тоглож сурсан. Аав маань надад зааж өгч байсан.
Хэзээнээс шатрын дугуйланд хичээллэж эхэлсэн бэ?
Таван настайгаасаа мэргэжлийн шатрын клубт явж эхэлсэн. Хамгийн анх явж байсан клуб маань “Хожлын нүүдэл”. Одоо явж байгаа “Дагшаахүү” шатрын клубтээ долоон настайдаа явж байгаад хэсэг өөр клубт явсан. Энэ клубтээ эргэж ирээд нэг жил болж байна.
Яагаад шатрын спортоор хичээллэх болов?
Өвөө, аав хоёр маань гэртээ их шатар тоглодог байсан. Үүнийг хараад шатар тоглож сурахаар шийдсэн. Анхны тэмцээндээ амжилттай оролцож, медаль аваад шатрын спортоор цаашдаа хичээллэхээр шийдсэн.
Анх медаль хүртсэн тэмцээн нь ямар тэмцээн байсан бэ?
Би дөрвөн нас 10 сартайгаасаа тэмцээнд оролцож эхэлсэн. Анхны тэмцээнээсээ алтан медаль авч байсан ч нэрийг нь санахгүй байна. Ямар ч байсан цэцэрлэгт байхдаа л медаль авсан.
2022 оны Өсвөр үеийн шатрын аварга шалгаруулах тэмцээнээс 9-10 насны ангилалд алтан медаль хүртсэн. Өмнөх жилүүдийн УАШТ-д ямар амжилттай оролцож байсан бэ?
Өмнө нь 2020 оны Өсвөрийн шатарчдын улсын аварга шалгаруулах тэмцээнд стандарт мөн блиц төрлүүдэд алтан медаль авч улсын аварга болж байсан.
2022 оны УАШТ-ээс алтан медаль хүртсэн. Ямар арга, тактик баримталж аварга болсон бэ?
Нийт есөн өрөг тоглосноос долоо хожиж, нэг хожигдож, нэг тэнцсэн. Гараан дээрээсээ илүү тоглож өрсөлдөгчөө хожсон. Бэлтгэлд үзсэн тактикаа баримталж стратегийн тоглолтуудыг хийж тоглосон.
Шатраар хичээллэхийн давуу талыг хэрхэн хардаг вэ?
Зөв тоглож сурснаар тэвчээр сууж, бодол санаагаа цэгцэлж мөн зөв сонголт хийх шийдвэр гаргах, шударгаар өрсөлдөхийг сурдаг гэж боддог.
Шатрын дугуйландаа долоо хоногт хэдэн цаг зарцуулдаг вэ?
Долоо хоногт гурван удаа хичээллэдэг. Тэмцээн дөхөхөөр өглөөнөөс орой хүртэл мэргэжлийн тамирчин шиг бэлтгэл хийдэг.
Шатраар хичээллэдэг хүүхэд бүр л амжилт гаргахыг хичээдэг. Гэвч зарим нь чаддаггүй. Энэ хүүхдүүдэд ямар зөвлөгөө өгөх вэ?
Өдөр бүр бэлтгэлээ хийх хэрэгтэй. Шатрын тоглолт хийхээс гадна өөрийн хэмжээндээ 2-3 шатрын бодлого бодох. Их биш, бага биш ч биш тогтмол бэлтгэлээ хийх хэрэгтэй гэж бодож байна.
2022 онд Өсвөрийн шатарчдын Азийн аварга шалгаруулах тэмцээн болон Дэлхийн аварга шалгаруулах тэмцээнд оролцоно. Олон улсын тэмцээнүүдэд өөрийгөө хэрхэн бэлдэж байна вэ. Гадаад орон руу явна гэхээр ямар санагдаж байна?
Гадагшаа тэмцээнд орно гэхээр гоё санагдаж байна. Сургууль амрахын өмнө гэртээ бодлого бодож байсан. Сургууль амарснаас хойш клубтээ бэлтгэл хийж байгаа. Өмнө нь Турк улсын Анталья хот руу С.Ган-Од багштайгаа долоон настайдаа Сурагчдын дэлхийн аварга шалгаруулах тэмцээнд оролцож 10-р байрт орж байсан.
.jpg)
Өрсөлдөгч нараа судалсан уу. Аль улсын тамирчид хамгийн хүчтэй гэж харж байна вэ?
Энэтхэг, Орос, Казахстан, БНХАУ, Вьетнам тамирчид маш сайн тоглодог. Гол өрсөлдөгч гэвэл тэднийг нэрлэхээр байна. Гүрж улсад болох тэмцээн маш ширүүн өрсөлдөөн ихтэй болох байх. Учир нь шатрын спорт их сайн хөгжсөн улсуудтай ойрхон болохоор сайн хүүхдүүд ирэх магадлал өндөр. Энэ нь намайг илүү хурцалж байгаа.
10 хүртэлх насны шатрын тамирчид дундаа түргэн тоглолтын чансаагаар нэгдүгээрт бичигддэг гэсэн.
Манай клуб мөн "Хос мастер" шатрын академиас зохион байгуулсан олон улсын чансаа боддог блиц, рапид төрлийн тэмцээнд амжилттай оролцож, чансаагаа амжилттай ахиулж чадсан.
Шатрын спортоороо цаашид ямар амжилт гаргахыг мөрөөддөг вэ?
Өсвөрийн ДАШТ-ээс алтан медаль хүртэж, аварга болохыг хүсдэг. Гадаад улсад Монгол Улсынхаа төрийн дуулал эгшиглүүлж, далбаагаа тэнгэрт нь мандуулахыг хүсдэг.
Шатрын спортоор Монгол Улсынхаа ямар рекордыг эвдэнэ гэж хүсдэг вэ?
Ямар ч байсан их мастер цолтой болно гэж боддог. Рекордын хувьд санаа оноо байхгүй л байна.
Шатрын спортоо орхих тухай бодож байсан уу?
Нэг том тэмцээнд амжилтгүй оролцоод 6 сар шатраараа хичээллэхгүй байж байгаад буцаад хичээллэсэн. Одоо бол тийм бодол байхгүй.
Амжилтынх нь нэг хэсэг аав, ээж, сургуультай нь зайлшгүй холбоотой. Сургууль болон гэр бүлийн зүгээс Анандыг хэрхэн дэмждэг вэ?
Аав, ээж маань намайг тэмцээн алгасуулахгүй оролцуулж, аав маань тэмцээнд авч явдаг. Ээж маань хоол бэлдэж өгдөг мөн эмээ минь клубт байнга зөөдөг тул их баярлаж явдаг. Сургуулийн зүгээс улсын хэмжээний том тэмцээний өмнө чөлөө өгч, ангийн хамт олон урмын үг болон сэтгэл санааны дэмжлэг их өгдөг.
Ангид нь шатар тоглодог хүүхдүүд хэр олон байдаг вэ?
Сургуулийн шатрын клубт хичээллэдэг манай ангийн 2-3 хүүхэд байсан. Гэвч коронавирус гараад явахаа больчихсон байна лээ.
Чөлөөт цагаараа юу хийх дуртай вэ?
Усан бассейнд явах дуртай. Долоо хоногт гурван удаа явдаг. Цаашдаа усан спортоор мэргэших бодолтой байдаг.
Шатар тоглодог найзууддаа хандаж юу гэж хэлмээр байна вэ?
Нэг тэмцээнд муу оролцсон байлаа гээд шатраа битгий орхиорой гэж хэлмээр байна. Хүн бүрд ялагдах өдөр байхад бас ялах өдөр байдаг гэдэгт би итгэдэг.
С.Ган-Од: Шавиа сайн бэлтгэж Монгол Улсын шатрын спортын олон амжилтыг шинэчлэхийг хүсэж байна
М.Ананд шатрын “Дагшаахүү” клубт хичээллэдэг. Түүний багш нар нь шигшээ багийн дасгалжуулагч нар болох Дэлхийн шатрын холбооны зааварлагч багш Ч.Баттүвшин, Дэлхийн шатрын холбооны мастер С.Ган-Од нар юм. С.Ган-Од багш “М.Ананд үеийнхнээсээ их хичээнгүйгээс гадна оюуны чадамжтай. Монголын номер нэг шатарчин, хамгийн залуу их мастер Д.Батсүрэн манай клубийн тамирчин. М.Ананд бид хоёрын хувьд түүний рекордыг эвдэх гэж хичээнэ. Шатрын спортод амжилт гаргахад ар гэрийн дэмжлэг хамгийн чухал. Гэрт нь бэлтгэл хийх боломжоор хангаж, дугуйланд нь өдөр бүр хүргэж өгч, авах, тэмцээн уралдаанд тасралтгүй хамруулах хэрэгтэй. М.Анандын хувьд сургууль, эцэг эхийн зүгээс маш сайн дэмждэг. Түүний амжилтын нэг хэсэг нь энэ юм” хэмээсэн юм.
Зочин 1 сарын өмнө
okk daraa taarnaa
0 0 Хариу бичихЗочин 1 сарын өмнө
Mundag dvvdee ulam ih amjilt gargaarai gej hvsen eruue
0 0 Хариу бичихЗочин 1 сарын өмнө
Mundag! amjilt
0 0 Хариу бичихЗочин 1 сарын өмнө
Yostoi mundag huu bnaa, amjilt husyee
0 0 Хариу бичихХүсэл нь биелэх болтугай 1 сарын өмнө
Хөөрхөн ухаалаг хүү байна Монголын маань ирээдүй гэрэл гэгээтэй сайхан байх болтугай
1 0 Хариу бичихricho 1 сарын өмнө
mundag huu bna, amjilt husii
1 0 Хариу бичих