Энэ жилийн "Met Gala" загварын цэнгүүнд Ким Кардашианы өмссөн даашинз олны анхаарлыг эрхгүй татсан билээ. Реалти шоуны од тус арга хэмжээнд ирэхдээ алдарт жүжигчин Мэрилин Монрогийн даашинзаар гангарсан юм. 1962 онд Ерөнхийлөгч Жон Кеннедид төрсөн өдрийн дуу дуулж өгөхдөө Мэрилиний өмсөж байсан даашинзыг Ким музейгээс түр зээлж өмссөн. Эхэндээ даашинз түүнд таарахгүй байсан ч Ким Кардашиан гурван долоон хоногийн хугацаанд эрчимтэй дасгал хөдөлгөөн хийж долоон кг хасан Монрогийн даашинзад багтаж чадсан тухайгаа өгүүлж байсан юм. Ким улаан хивсний ёслолд оролцсоныхоо дараа жинхэнэ даашинзыг хүлээлгэн өгч хуулбарыг нь сольж өмссөн тухайгаа өгүүлсэн. Тэгвэл онцгой даашинз хуурай цэвэрлэгээ, сэргээн засварлалтын дараа музейд буцаж ирэхдээ ихээхэн хэмжээгээр гэмтсэн болохыг Мэрилиний шүтэн бишрэгчид олж илрүүлжээ. 2016 оны зурагтай харьцуулахад оёдол нь хэд хэдэн газар ханзарч, чимэглэлийн талст нь унаж үгүй болсныг доорх зургаас харж болно.