Борооны ус зайлуулах шугам угсралтын ажил эхэллээ

Урин дулааны улиралд борооны улмаас авто зам, нийтийн эзэмшлийн талбай усанд автаж иргэд, аж ахуйн нэгж байгууллагуудад хүндрэл үүсдэг. Уг асуудлаас урьдчилан сэргийлэх үүднээс  НЗДТГ, Нийслэлийн Замын хөгжлийн газрын  захиалгаар Геодези, усны барилга, байгууламжийн газар /ГУББГ/ авто зам, талбайн шугам сүлжээний өргөтгөл шинэчлэлийн шугам угсралтын ажлыг эхлүүлжээ. 

Улмаар Хан-Уул дүүргийн нэгдүгээр хороо Чимэд-Осорын гудамж Эрэлийн байр, Сонгинохайрхан дүүргийн 18 дугаар хорооны  12 дугаар байр орчимд борооны ус зайлуулах шугам угсралтын ажлыг хийж байгаа аж. Мөн Чингэлтэй дүүргийн  12 дугаар хороо 61 дүгээр сургууль орчмын зам, талбайн ус зайлуулах шугамын  угсралт, Хан-Уул дүүргийн 3 дугаар  хороо Ажилчны гудамжнаас Яармагийн гүүр хүртэлх /Шунхлай ШТС/ авто замын ус зайлуулах шугам угсралтын ажлуудыг хийж гүйцэтгэхээр төлөвлөжээ.

ГУББГ нь 2022 онд авто замын борооны болон хөрсний ус зайлуулах шугамын засвар, нөхөн сэргээлтийн ажлыг таван  байршилд, шугам угсралтын ажлыг дөрвөн байршилд тус тус хийж гүйцэтгэхээр төлөвлөн,  төлөвлөгөөний дагуу ажлуудаа хийж буй. Өнгөрсөн онд тус газраас авто замын борооны ус зайлуулах шугам угсралтын ажлын хүрээнд Чингэлтэй дүүргийн Долоон буудал болон Баянбүрдийн тойрог, Баянгол дүүргийн Энхболдын авто зам болон Ард Аюушийн өргөн чөлөө,  Хан-Уул дүүргийн Наадамчдын гудамж, Сонгинохайрхан дүүргийн Таван  шарын 12 дугаар байр орчим, нийт зургаан  байршилд шугам угсралтын ажлыг хийж гүйцэтгэсэн байна. 


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)