Ардчилсан намаас цаг үеийн асуудлаар мэдээлэл хийлээ.

АН-ын Ерөнхий нарийн бичгийн дарга Ч.Өнөрбаяр

УИХ-ын гишүүдийн бүрэн эрхийг түдгэлзүүлэх асуудал эрх баригч намын жүжиг байсан. Туушин зочид буудалд хурал хийж, цаас өгч, аваад л. Ингээд жагсаалт гарч ирсэн. Сонсгол хийсэн. Улмаар намын дарга, ерөнхий нарийн бичгийн дарга нь намын гишүүдтэйгээ тэмцэнэ гэж ярьсан. Гэтэл дундаасаа нэрс нь хасагдаад, цөөрөөд байсан. Сүүлдээ эрх баригч намын гурван гишүүн үлдсэн. Уг гишүүдийн асуудал ч гэсэн бүдгэрэх нь. Миний сонссоноор мөнгөө сонгуулийнхаа хандивт өгсөн юм шиг байна. Бидэнд байгаа мэдээллээр бүрэн эрхийг нь түдгэлзүүлэх гэсэн гурван гишүүн “2020 оны сонгуулиар намдаа хандивласан” гэж ярьсан байна. Энэ үнэн бол ноцтой асуудал. УИХ-ын 2020 оны сонгуулийн мөнгийг эрх баригч нам иймэрхүү схемээр босгосон юм байна. Хөгжлийн банк, төрийн өмчит компаниудаас мөнгө босгож байгаад сонгуулиа хийсэн дүр зураг харагдаж байна. Ингээд үүндээ шантаажлаад, бүдэрч унаад УИХ-ын гишүүдийн бүрэн эрхийг түдгэлзүүлэх асуудал нь гацаанд орсон гэж харж байгаа. Ер нь МАН ийм схемээр явдаг.

АН-ын Эдийн засаг хариуцсан дэд дарга Ч.Отгочулуу

Улсын төсвийн тодотгол хэлэлцэгдэж байгаа. Энэ төсвийн тодотгол нь агуулга, хэлбэрийн хувьд алд дэлэм зөрүүтэй байна. Жишээлбэл, Улсын төсвийн орлогыг 30 хувиар нэмэгдүүлсэн байна. Төсвийн бодлого нь Монгол Улсын макро эдийн засгийн үндсэн бодлого байдаг. Уг бодлогыг хийхийн тулд нөхцөл байдлаа маш сайн ойлгосон байх ёстой. Гэвч эдийн засгийн эрүүл мэнд ямар байгаа талаар ямар ч онош дүгнэлт хийгээгүй байна гэдгийг хэлэх хэрэгтэй байна.

Энэ төсвийн тодотголын хамгийн ноцтой зүйл нь өрийг их хэмжээгээр нэмэгдүүлсэн байна. Ингэхдээ дансны аргаар заль зохиожээ. Жишээлбэл Дэлхийн банк манай улсын Засгийн газрын өрийг эдийн засгийнхаа 92 хувьтай тэнцэж байна гэдэг дүгнэлт гарчихаад байгаа. Гэтэл Засгийн газар 50 хувь байгаа учраас үүнийг 60 хувь болгоно гэж байна. Түүнчлэн үндсэн хуулийн зөрчилтэй буюу ардаа алагчилсан төсөвтэй болсон байна. Зөвхөн Хэнтий аймагт 700 орчим тэрбум төгрөгийн хөрөнгө оруулалт хийнэ гэж байна. Гэтэл нийт төсвийн хөрөнгө оруулалт гурав орчим их наяд байдаг. Хэнтий аймгийн сумын төвүүдэд иргэдэд үйлчлэх мэдээллийн төвийг олноор нь байгуулахаар тусгажээ. Ковидын нөхцөл байдал олон улсад хүндэрч байна. Иймээс ойрын 2-3 жилдээ аялал жуулчлал хөгжихөөргүй байна. Жилд 400 сая Жуулчин хүлээж авна гэдэг 5-10 жилдээ худлаа. Дарханы замаа засахгүй байж Хэнтийд их олон зам тавина гэжээ. Энэ мэтээр маш муу болсон төсөв. Монгол Улсын түүхэнд хагас жилийн дотор төсвийг гурван удаа хэлэлцэж байсан ийм түүх байхгүй. УИХ-ын үндсэн ажил бол төсөв батлах. Гэтэл энэ ажил дээрээ ийм хариуцлагагүй хайнга хандаж байгаа нь Засгийн газар ямар сул болохыг харуулж байна. Манай улс ковидын жилүүдэд хамгийн хатуу хөл хорио тогтоосон. Үүнээс болж хамгийн их хохирсон хүмүүс бол монгол эмэгтэйчүүд. Ийм учраас тойргийн усалгаа болсон төсвүүдийг зогсоогоод оронд нь эмэгтэйчүүдийн бизнесийг дэмжсэн сангууд руу хөрөнгө оруулалтыг ихээр хийх хэрэгтэй гэсэн шаардлагыг тавьж байна. Мөн энэ жил бэлчээрийн доройтол их, өвс ногоонй гарц муу байх төлөвтэй байна. Иймээс энэ чиглэлд анхаараач ээ. Түүнчлэн хөрөнгө оруулалтыг татах чиглэлд анхаарах хэрэгтэй байна. Энэ төсвийн тодотголоор үр ашиггүй төсвийг хянах хэрэгтэй.